Meeqqat '51-imi nuutsitaasut Danmarkimi sammineqalerput

Folketingimi inatsisartunilu ilaasortaq Juliane Henningsen qanittukkut oqarpoq, pisimasoq Folketingimi oqallisissatut saqqummiutissallugu, oqarluni Statsminister Lars Løkke Rasmussen pisortatigoortumik meeqqat 22-it 1951-imi ilaquttaminnit peersitaasut utoqqatserfigissagai.

Helene Thiesen arfineq-marlunnik ukioqarluni anaanaminit qatanngutiminillu marlunnit Nuummi avissaartitaavoq. Sooq taamani angerlarsimaffimmit peersitaanerluni naluaa ukiorpassuilli qaangiummata paasivaa, misiligummi peqataatinneqarsimalluni.

Danskit naalagaaffiata kalaaliaqqat 22-t angerlarsimaffiannit 1951-imi peersippai Danmarkimullu nuutsillugit, danskisut inuunermik ilinniarnissaat siunertaralugu.

Meeqqat kingorna Nuummi Børnehjemmemut pisitaapput.

Kalaalliaqqat qallunaanngorsarneqartut Kalaallit Nunaanni siuttussatut takorloorneqarput.

Meeqqat ilaat, Helene Thiesen, Danmarkimi ullumikkut najugaqarpoq, naallu ukiut 58-t qaangiutereeraluartut ulloq meeqqat allat peqatigalugit angallammut ikititaaffini puigunngisaannarpaa. Angallammit ilaasartaammut Diskomut ikaartussaapput.

- Kufferteerara paariitigalugu anaanaga isigiuarpara, eqqarsarpungalu: Sooq-una paarinngikkaanga... taava aallarpugut. Anaanaga milliartuinnavissoq tussunngoqalunga isigiuarpara. - Sussagatta, sooq-una aallartitaasugut, eqqarsarpunga.

Helene Thiesen pinngitsaalisaalluni nuutsitaasimasutut misigisimavoq. Nuummummi uteraluarami meeqqat angerlarsimaffiannut pisitaavoq, kalaallisullu oqaloqqusaanani. Arni qallunaatut oqaluppiarsinnaanngitsoq qaqutiguinnaq takusarpaa. Kingorna paasivaa anaanani sapaat allortarlugu taamaallaat takoqqusaasoq. Anaanamilu takusarneri puigorsinnaanngilai.

- Nipaallisimaqatigiittarpugut, oqaaseqarnata immitsinnut nakkuttarluta. Uanga aperisinnaaneq ajorpara sooq angerlarsinnaannginnersunga. Meerassillungami isumaqarpunga aperiguma naalanngitsuliussallunga, kingunerisaanillu nunamut allamut nuutsitaaqqissasunga, Helene Thiesen oqaluttuarpoq.

Meeqqat ilaat qallunaanik angajoqqaarsiaqalerput, ilaallu Kalaallit Nunaannut tuteqqinngisaannarput.

Helene Thiesen isumaqarpoq Danmarkip naalagaaffia utoqqatsertariaqartoq.

- Pisoq uagutsinnut eqqugaasunut kusanaaqisoq ima akuersornanngitsigaaq, allaat utoqqatsertoqarnissaa pissusissamisuuginnartutut isigisariaqarluni, naggasiivoq.

Helene Thiesen Kirsten Rosingimit Danmarks Radio-aneersumit apersorneqarpoq.

Aviisi Politiken ullumi saqqummersoq pisimasumik allaaserinninnermini Nunatsinni Naalakkersuisut siulittaasuat Kuupik Kleist Danmarkip statsministerianut pisumut tunngatillugu saaffiginnissamaartoq oqaatigaa.

- Nunat nunasiaateqartut pisarnerattut kalaallit pineqarsimapput. Kukkussutaasimanera nassuerutigigaanni soorunami inatsisitigut pisussaaffiliissaaq. Taamaammat 1951-imi kingornalu pisimasut qulaajaqqissaarneqartariaqarput, Kuupik Kleist ullumi oqarpoq.

Aamma socialdemokratit taamatorluinnaq piumasaqarput.

- Misiligummik ingerlatsisimanerup iternga tikillugu misissuiffiginissaa aningaasaliiffigineqartariaqarpoq. Danmarkip oqaluttuarisaanerani pisut taartortaasa ilagaat. Meeqqat oqartussanit nakkutigineqartut eqqunngitsuliorfigisimavagut, isumaginninnermut atatillugu oqaaseqartartoq Mette Frederiksen oqarpoq.

Ikiuiniaqatigiiffiit Red Barnet aamma Dansk Røde Kors, Danskit naalagaaffiat peqatigalugu, kalaalliaqqat qallunaanngorsagaanissaanik suliaqarsimasut ullumi nassuerutigaat meeqqanut - ullumikkut isiginnittaaseq malillugu - taamanikkut naapertuilluannguitsuliorneq angingaartoq suleqataaffigisimallugu.

Kattuffiit Politikenimut oqarput, taamani kukkunertik ilinniarfigisimallugu, ullumikkullu sulinerminni inuit nunap inuiisut pisinnaatitaaffii, soorlu kulturimut oqaatsinullu tunngasut pingaartilluinnarlugit sulillutik.

Inunnik isumaginninnermut ministeri Karen Ellemann kalaaliaqqat 1951-imi pineqarsimanerat pillugu oqaaseqarusunngilaq, statsministerimulli innersuussilluni.

Danmarkip Radioata statsministeri ullumi oqaaseqartissinnaasimanngilaa.