Meeqqat 2.000-it Nuummi arpassapput

Kalaallit Nunaanni atuarfimmi timersorneq, Kommuneqarfik Sermersooq, Timi Asimi aamma Air Greenland suleqatigiillutik aaqqissuuppat Nuummi Kommuneqarfik Sermersoorlu tamakkerlugu arpatsitsineq. Nuummi atuartut 2.000-it saniatigut kommunip sinnerani atuartut 1.000-it missaasa arpannissaat ilimagineqarpoq.

- Pingajussaa manna aaqqissuuttussaavarput qujanartumillu iliniartitsisut atuartullu tapersersuilluarput. Pisussaq pimooruppaat klassellu akunnerminni unammisorujussuupput. Atuartoq 2 kilometeri arpakkaagami ilisarnaammik pissarsisassaaq, atuartullu klasseminnut uterpata qanoq arpassimanersut naatsorsorneqarumaarpoq, Kim Godtfredsen Atuarfimmi timersortitsinermeersoq suliniummilu siuttuusoq oqarpoq.

Arpanneq aallartillugu borgmester Asii Chemnitz Narup aallartitsissaaq aammalu aallarnissaq sioqqutilaarlugu naatsumik meeqqanut oqaaseqarumaarluni. Aqquserngit HJ Rinksvej aamma Kuussuaq politiit assersussavaat sillimaniarneq pissutigalugu. Arpaffik illoqarfiup iluani 2 kilometerinik isorartussuseqarpoq Nuutoqqap eqqaani pissalluni arpattullu Katuap eqqaani aallarlutillu apuutissapput.

- Taama amerlatigisut arpaqatigineranni pissangaamminngitsoorfiunngilaq. Naak atuarfiit namminneq aamma arpatsitsisaraluartut una assersuuneqarsinnaanngilaq. Assut qilanaarpunga peqataasussarpassuit takunissaannut. Atuartut namminneq aalajangerumaarpaat qanoq takitigisumut arpanniarnerlutik, kisianni misilittakkat takutippaat imminnut unammisaqisut taamaammat ikittuinnat arpaffik ataasiaannarlugu arpassagunarput, Kim Godtfredsen oqarpoq.

Nunatsinni arpatsitsinerit annerssat pissaaq sisamanngorneq maajip 31-anni nalunaaqutaq 09.30-miit 11.00-ip tungaanut.