Meeqqat 17-it allagartartaarput
Meeqqat qarasaasiamik ilinniarfiat, BITA, Nuummi Barista Netcafé piumassutsiminnillu ikiuuttut arfinillit suleqatigalugit, Kalaallit Røde Korsiannit ukiormanna marsimiit aaqqissuunneqartoq, ullumi naammassivoq.
Allattoq Mads Lynge
- Meeqqat qarasaasiamik ilinniarfiannut meeqqat 20-t peqataaniarlutik nalunaarsimapput, meeqqallu 17-it arfininngornerit tallimat ilinniartitsisunit soqutiginnilluartunit Baristap iniutaani pimoorussamik pinnguarnikkut ilinniartinneqarnermikkullu naammassipput, Kalaallit Røde Korsiannit taama allattoqarpoq.
Meeqqat suliaannik saqqummersitsisoqarneranut peqatigitillugu peqataasimanermut uppernarsaatit tunniunneqarput.
Meeqqat qarasaasiamik ilinniarfiat, BITA, assigiinngitsunit aningaasalersorneqarpoq, assersuutigalugu Prins Nikolai og Prins Felix' Fond suliniummut 50.000 koruuninik aningaasaliilluni.