Meeqqap angajoqqaani takusinnaasariaqarpai
Meeqqat pillugit peqatigiiffiit assorsuaq tapersersorpaat - ingammik inatsisitigut ataataqanngitsut ilinniarfiginerisigut.
Anaana ataatalu najugaqatigiinngippata, meeqqap tamaasa takusinnaasariaqarpai. Angajoqqaat akisussaaffiinut inatsimmi taama allassimasoqaleriaannaavoq.
Meeqqat inuunerissut assut tapersersuisunut ilaapput, siulersuisuni ilaasortaq Brita Nielsen Johansen ima oqarpoq:
- Naalagaaffiit Peqatigiit Meeqqat pillugit aalajangersagaanni allassimavoq meeqqap kingoqqiffimmi ilisimanissaat piginnaatitaaffigigai, taamaattumik isumaqarpugut, angajoqqaat isumaqatigiinngissuteqaraluarpataluunniit, meeqqap tunuliaqutini ilisimasinnaatitaagai.
Meeqqat ilisimatusaatiginerisa takutippaat, angajoqqaat averusersimagaluarpataluunniit- kingusinnerusukkut inuunermi ingerlanerani meeraq assut nukittunerusartoq, anaanaminut ataataminullu attaveqartarsimagaangami.
- Pisoqarsimasinnaavoq angajoqqaap arlaanut meeqqap attaveqarnissaa pitsaaquteqarsinnaanani. Meeqqalli angajoqqaaminut marluusunut pisariaqartitsinera akuerisariaqarparput. Meeqqammi angajoqqaat aaqqiagiinngissutaat kigornguttussaanngilai, aaqqiagiinnginnermulluunniit akuutinneqarani.
AAMMA ATUARUK Meeqqamut akisussaaffik angajoqqaat marluullutik pigissavaat
Meeqqanut siunnersuisoqatigiit taama isummeriaaseq isumaqatigaat - ingammik inatsisitigut ataataqanngitsortatta ukiuni kingullerni oqaluttuarisartagaat eqqarsaatigalugit. Meeqqanut siunnersuisoqatigiit oqaaseqartartuat William Kriegel ima oqarpoq:
- Oqaluttuarisaaneq eqqarsaatigalugu ajornartorsiutit killormoortut takusimavagut. Kingullermik Kalaallit Nunaanni inatsisitigut ataataqanngitsut pillugit suliaq, kinguaariinni ataatsini tamarluinnangajammik ataataminnik ilisarisimanninngittut.Aatsaat maannakkut oqaasertalerneqarpoq, ujariatsineq qanoq annertutigisimanersoq, qanorlu ajornartigisimanersoq alliartorneq tamaat inatsisitigut akuerisaasumik ataataqarani. Oqaluttuarisaanermi takoreerparput, meeraq periarfissinngikkaanni alliartornermini angajoqqaani tamaasa najorsinnaallugillu ilisimasariaqarmagit qanoq kinguneqarsinnaasoq inatsisitigut aaqqiiviginngikkaanni.
Meeqqap angajoqqaaminut piginnaatitaaffia inatsimmut allamut allannguutissamut atasuuvoq, katissimanngitsut averusersimasullu meeqqap inunngorneraniit angajoqqaatut ataatsimut akisussaaffilerneqarnerisigut.
