Meeqqamut akisussaaffik angajoqqaat marluullutik pigissavaat
Inatsisartut sapaatip akunnerata tulliani ataatsimiilissapput, tassanilu malittarisassat nutaat meeqqanut- ilaqutariinnullu tunngasut isummerfigineqassapput.
Malittarisassat tamakku pillugit Namminersorlutik Oqartussat namminneq qallunaat naalagaaffiat qinnuigisimavaat nutartereqqullugu, tamakkumi qallunaat suli akisussaaffigimmatigit.
Malittarisassat nutaat ilagaat meeqqap inunngorneraniit angajoqqaat marluullutik akisussaasuussasut.
Angajoqqaat marluullutik meerartik akisussaaffigissavaat - katissimagunik katissimanngikkunilluunniit.
Malittarisassaq nutaaq taama tunngaveqartoq piviusunngorsinnaavoq Inatsisartuni amerlanerussuteqartut akuersippata.
Peqatigiiffiup Meeqqat Inuunerissut malittarisassaq taanna taperseraat, siulersuisuni ilaasortaq Britta Nielsen Johansen oqarpoq:
- Angajoqqaat marluullutik meeraq pinngortissimavaat. Taamaattumik isumaqarpugut pingaaruteqartoq marluullutik meeqqap atugarissaarnissaanut akisussaasuuppata.
Naalagaaffiit Peqatigiit Meeqqat pillugit isumaqatigiissutaanni meeraq angajoqqaaminut piginnaatitaaffeqarpoq. Malittarisassarlu taanna piginnaaniligaanermut inatsisip allanngortinneranut assingusoq Nunatsinni Meeqqat pillugit siunnersuisoqatigiit oqaaseqartartuata William Kriegelip nassuiarpaa:
- Angajoqqaat katissimanngippata ullumikkut anaanaasup akisussaasunngortarnera pissusissamisut isigineqartarpoq. Tamatumalu allanngortinneqarneratigut meeqqap angajoqqaani tamaasa pigilissavai. Oqaatigineqarniartoq tassaavoq meeqqap angajoqqaani marluutillugit pigissagai.
Angajoqqaat akisussaaqatigiisinnerisigut, angajoqqaat oqaanneqarput. Meeqqanut siunnersuisoqatigiit isumaqarput, angajoqqaat ullutsinni eqqarsartaasaannut inatsisiliorneq naleqqussagaasutut oqaatigisinnaagipput:
- Oqaluttuarisaaneq qiviaraanni nassuerutigisariaqarparput ataataasut siusinnerusumut naleqqiullugu ullutsinni meeqqamik mikineriniit attaveqarnerusartut. Pissusissamisoornerusutullu isigineqartoq meeqqap alliartornerani angajoqqaat marluullutik malittarinnittarnerat. Assiliaq taanna siusinnerusumut naleqqiullugu ullutsinni takussaanerujussuuvoq, taamaattumik inatsimmik pissusiviusumut naleqqussaanertut taaneqarsinnaasoq, siunnersuisoqatigiit isumaqarput.
Angajoqqaat avikkaluarpata ullutsinnut naleqqiullugu angajoqqaat ingerlaannaartumik marluullutik akisussaaqatigiittalissapput.
Angajoqqaat akisussaaqatigiinnerat pillugu malittarisassanik allannguiniarnerup meeqqamik katerisimaaqatiginnissinnaaneq aamma attorneqarpoq.
