Meeqqanut suliniuteqartut tapiiffigineqarsinnaalerput

Meeqqat Kalaallit Nunaanni najugaqartut sapinngisamik amerlanersaat aningaasaliinikkut iluaquserniarneqarput, sumiiffinni ataasiakkaani suliniuteqartut nukittorsarniarneqarlutik.

Peqatigiiffik Grønlandske Børnip siulittaasuata Tina Fausingip suliniuteqarniarlutik qinnuteqartussat qilanaarai. Qinnuteqartut komitemi nalilersorneqassapput, aningaasanillu tapiiffigineqassanersut aalajangerneqassalluni.

Aningaasat tapiissutitut atorneqartussat 450.000 koruunit ilaat siorna inuussutissarsiuteqarneq pillugu ataatsimeersuarnermi, Future Greenlandimi katersorneqarput, Kalaallit Nunaanni suliffeqarfiit 46-t aningaasanik 350.000 koruuunik katersipput, sinnerilu namminersortunit tapiissutit 100.000 koruuniullutik.

Kalaallit Nunaanni meeqqanut suliniuteqartut, kikkulluunniit aningaasanik qinnuteqarnissaminnut kajumissaarneqarput, nunaqarfimmiikkunik illoqarfimmiikkunilluunniit.

Suliniuteqartut ullumikkumiit februarip ulluisa 28-ata tungaanut qinnuteqarsinnaapput.