Meeqqanut Avannaata Qimussersuaqassaaq

Inersimasut Avannaata Qimussersuani sukkaniunnissarsuat arfininngorneq martsip 23-at pissaaq qimussit aqqutaata aallartiffiani Narsarsuarmiit aallartoqassalluni. Tallimanngornermili sukkaniunneq mikinerusoq pissaaq Avannaata Qimussersuaaqqami meeqqat qulit 14-illu akornanni ukiullit sukkaniutilerpata.

- Illoqarfiit peqataatitaqartussat nalunaarfigaagut meeqqanik marlunnik peqataatitaqarsinnaasut aammalu amerlanerussappata ajoriffissaqartinngikkipput, Avannaata Qimussersuanik aaqqissuisut Qimussersaq 1971 sinnerlugu Niels, Aqqaluartaaq, Petersen KNR.gl-mut taama oqarpoq.

Avannaata Qimussersuani ukiuni 25-ni sukkaniuttoqartarnerani siullerpaamik meeqqat sukkaniutsinneqartussanngorput.

- Meeqqat peqataatinniarnerannut pissutaavoq qimussertarnerup soqutigineerukkiartortutut innera illuatungilerniaratsigu. Kinguaariit tulliisa qimussernermik soqutigisaqarnissaat aamma qulakkeerusupparput, Niels, Aqqaluartaaq, Petersen oqarpoq.

Pilersaarutit malillugit Ilulissat illoqarfiata ungatinnguaniittoq Narsarsuaq kaajallallugu iluliarmiut oqartarnerattut ’nunarsuaq kaajallallugu’ meeqqat sukkaniutsinneqassapput. Taanna 8 kilometeri missaliorlugu isorartussuseqarpoq tassanilu sukkaniunnermi amerlanerpaamik tallimanik qimmeqarsinnaatitaassapput.

Avannaata Qimussersuani sukkaniunnersuaq arfininngorneq martsip 23-at pissaaq.