Meeqqanut atuagaq Nunani Avannarlerni atuagaateqarfinni 2000-ini atuffassissutigineqassaaq
Matumani pineqartoq tassaalluni Lana Hansenip meeqqanut inuusuttunullu atuakkiaa, "Sila", taanna Nunat Avannarliit ministeriisa siunnersuisoqatigiiffiata ukiaru ukiumoortumik Atuagaateqarfinnut sapaatip akunneqartitsilerpata ilaatinneqassaaq.
Atuagaateqarfiit sapaatip akunneqartinneranni atuffassinerpassuit, saqqummersitsinerit kulturikkullu aaqqissuussinerit allat, Nunani Avannarlerni, Nunarput ilanngullugu atuagaateqarfinni, atuarfinni tuusintilikkaani pisussaapput.
Taama sapaatip akunneqartitsineq novembarip aqqarnanni ullormik atuffassiffiusumik aallartissaaq ukiormannalu sammineqartussaq tassaalluni "Nunani Avannarlerni ukiuusarnera". Tamatumunngalu atatillugu Lana Hansenip atuakkiaa "Sila" meeqqanut inuusuttunullu atuffassissutigineqartussanut ilaavoq.
Inersimasut novembarip aqqarnanni Nunarput pillugu aamma tusagassaqartinneqalaassapput. Tamatumunngalu atatillugu Peter Høeg-ip atuakkiaa "Niviarsiaq Smilla apullu" atuffassissutigineqassalluni.
Taamaalilluni sumiiffinni assigiinngitsuni 2.000-init amerlanerusuni atuagassanik aalajangersimasunik oqaatsit assigiinngitsut atorlugit atuffassisoqarnissaa pisortatigoortuunngikkaluamik nunarsuarmi rekordiliisoqassasoq, Nunat Avannarliit ministeriisa siunnersuisoqatigiiffianit nalunaarutigineqarpoq.