Meeqqanik persuttaasarneq immikkut sammillugu isumasioqatigiittoqalersoq
Nunatsinni meeqqat ukioqanngitsunit 14-it tungaanut ukiullit 16 procentiisa peroriartornerminni anaanamik aapparisimasaminit maannaluunniit aapparisaminit persuttarneqartarnera misigisarpaat.
Taama persuttaasoqartarnera meeqqap peroriartorneranut sunniuteqangaatsiarsinnaavoq, naak assersuutigalugu meeraq persuttarneqanngikkaluarpalluunniit.
Suliniut "Kattunneq - Grønlands Krisecentre" aallaavigalugu Ilulissani maajip 20-anni katersuuttoqarpat tamanna pingaarnertut oqariartuutiginiarneqarpoq, immikkut ilisimasallit, meeqqanik ilaqutariinnillu sullissisut isumasioqatigiissinneqartussaammata.
Meeqqanik persuttaasarnerit pillugit ilisimasaqarnerulernissaq pisariaqartinneqartoq
Isumasioqatigiinnissamut nalunaartut Ilaqutariinnut sullissivinneersut imaaginnavissimapput, Nuka Fleischerilu saqqummiussisussanut ilaavoq. Taanna Mælkebøttecentrep immikkoortuani Ilasiami (Bo-enhed Ilasiaq) pisortaavoq. Immikkut ilisimasallit isumasioqatigiinnissaannut peqataarusullutik nalunaartut amerlanerisa takutippaa meeqqanik persuttaasarnerit pillugit annertunerusumik ilisimasaqalernissaq pisariaqartinneqartoq, Nuka Fleischer, Maryfondenip tusagassiuutinut nalunaarutaani ilaatigut taama issuarneqarpoq.
Nunatsianni qimarnuiit arfineq-marluusut sulisui maajip 19-ianniit 21-ata tungaanut isumasioqatigiissinneqassapput, pingajussaanillu isumasioqatigiinnermi, tamatumuuna suliniut "Kattunneq - Grønlands Krisecentre" aallaavigineqassalluni.
Suliniummi tassani suleqatigiittut tassaapput:
Maryfonden, Danner, Kalaallit Nunaanni Qimarnuiit, Mælkebøttecentret, Ilaqutariinnermut, Naligiissitaanermut Isumaginninnermullu Naalakkersuisoqarfik, kiisalu OAK Foundation Danmark.