Meeqqanik inuusuttunillu kingunerluuteqartunik ikiuinermik Nuummi isumasioqatigiittoqartoq

Isumaginninnermi siunnersortit, tarnip pissusianik ilisimasallit allallu allamik atuuffillit nunatta kommuniineersut 126-t meeqqanik inuusuttunillu kingunerluutilinnik ikiuinermik Nuummi isumasioqatigiileruttorput.

Kommunimi atuuffillit meeqqanik inuusuttunillu sakkortuumik soorlu ajutoornermik, atornerlunneqarnermik imminulluunniit toquttoqarsimaneranik nalaataqarsimallutik kingunerluutilinnik ikiuinerunissamut nutaanik najoqqutassaqalerusullutik isumasioqatigiipput.

Isumaginnittoqarfinnimi sulisut meeqqanik inuussuttunillu kingunerluutilinnik ikiuisartut ilarpassui ilinniarsimasuunngillat.

- Ilinniarsimasuunngitsortavut kingunerluutilinnik ikiuinermik ilisimasakipput. Taamaammat isumaginnittoqarfinni atuuffillit pikkorissarnissaat pisariaqarpoq, Isumaginninnermut Aqutsisoqarfiup inulerinermut immikkoortortaqarfiani tarnip pissusianik ilisimasalik aqutsisorlu Naja Lund Kielsen oqarpoq.

Meeqqanimmi inuusuttunillu kinguaassiuutitigut atornerluinerit nunatsinni amerlaqimmata, kingunerluutilinnik ikiuinermik paasinninnikinneq ajornartorsiutaavoq. Tamatuma saniatigut nunatsinni imminut toqussimasut imminulluunniit toqoriaraluarsimasut aamma amerlapput, taakkunanngalu amerlanersaat inuusukaajupput.

Quliusuni marluk ilinniarsimasuusut

Kommuneqarfik Sermersuup Tasiilami meeqqanut ilaqutariinnullu ingerlatsiviata ningiua, Gerda Fleischer, Nuummi isumasioqatigiittunut ilaavoq.

Tasiilap isumaginnittoqarfiani suliarinnittartut quliusut, taanna oqarpoq. Taakkunanna marluk isumaginninnermi siunnersortaapput, aappaa Nuummiit ikiuukkiartortuulluni. Sinneri allamik ilinniagaqarput ilinniarsimasuunatilluunniit. Tassanilu tarnip pissusianik ilisimasalik ataasiinnaavoq, taannalu upernaaru suliunnaassalluni.

­- Ilinniarsimasuunngitsortavut suliatik soqutigalugit sulisupput, isumaginninnermili siunnersortitulli paasisimasaqartiginngillat. Taamaammat meeqqat pillugit nalunaarutini assigiinngeqisumik nalilersueriaaseqartarpugut, Gerda Fleischer oqarpoq.

Meeqqamik oqaloqateqarnermi immersugassaq meeqqap kingunerluutaanik ukkassiffiusoq apeqqutinik imalik isumasioqatigiinnermi iluaqutissarsiffigilluarsimagini, Gerda Fleischer oqarpoq. Immersugassaq taanna isumaginninnermik suliallit tamarmik ilinniarsimasuugunik ilinniarsimasuunngikkaluarunilluunniit assigiimmik nalilersuinissamut iluaqutigisinnaasussaassavaat.

- Meeqqap tusaaneqarnissaanut assigiimmik immersugassaqalernitsigut assigiimmik nalilersueriaaseqarsinnaanngorpugut. Meeqqap sunik artorsaateqarneranik eqqoriaaginnarnata assigiimmik nalilersueriaaseqalernissamut najoqqutassaqalerpugut, Gerda Fleischer oqarpoq.

Nunatsinni tamarmi ajornartorsiutaasumut ikiuutaasoq

Isumaginninnermi siunnersortinik tarnillu pissusianik ilisimasalinnik sulisussaaleqineq Tasiilami kisimi ajornartorsiutaaqqajannngilaq. Ilinniarsimasunimmi sulisussaalatsineq nunatsinni tamarmi ajornartorsiutaavoq, Naja Lund Kielsen nassuiaavoq.

- Kommunit isumaginnittoqarfiini suliat qaleriiaakkunnaaqqullugit sulisut ilinniarsimasuunngitsut pikkorissarnerunissaat pisariaqarpoq, taanna oqarpoq.

Maanna sulisut tarnip pissusianik ilisimasallit suliaata ilarpassuisa assinganik suliaqarsinnaasortaqartut, Naja Lund Kielsen erseqqissaavoq. Kisianni:

-  Isumasioqatigiinnerput meeqqanik inuusuttunillu maannangaaq ikiuisalernissatsinnut iluaqutaaqqunaqaaq. Meeqqammi inuusuttullu inuunerinnerulernissaat qularnaarniarutsigu iliuuseqalertornissaq pikkoriffiginerulertariaqarparput, taanna oqarpoq.

Taakku oktobarip ulluisa 23-anniit 27-ata tungaanut isumasioqatigiipput.