Meeqqanik atornerluisartut katsorsartiffissaqanngillat
- Tasiorta 141-mik normoqartoq aqqutigalugu saaffiginnittoqartartoq paasisimavarput, aammali palasitut sulininni saaffigineqartarpunga ikiorneqarusuttunit, kisianni ajoraluartumik innersuussiffissaqanngilagut pissutsit taamaakkallartillugit, Palasi Emilie Steenholdt, Tasiortami siulersuisunut ilaasortaq oqarpoq.
Peqatigiiffik Tasiortamit meqqanik inuusuttuaqqanillu atoqateqarusuttartut katsorsarneqarsinnaalernissaannut iliuuseqaqqusipput.
- Tamanna Tasiortami siulersuisuni eqqartortareerlugu Danmarkimi Kalaallit Nunaannilu naalakkersuisut kajumissaarpagut ataatsimeersuartitseqqullugit, kalaallit nunaanni qanoq katsorsaasoqartarnissaanik ujartueqqullugit, Arnaq Grønvold oqarpoq.
Peqatigiiffiup Tasiortap meeqqanik inuusuttuaqqanillu kinguaassiutitigut innarliisarneq akuersaanngilaat. Meeqqat inuusuttuaqqallu illersorniarlugit kaammattuuteqarput.
- Pisariaqarluinnarpoq innarliisarneq annikillisarniaraanni, meeqqanik inuusuttuaqqanillu atoqateqarusuttartut katsorsartuarnissaat, taamaaliunngikkutta innarliisarnerit annikillisinnavianngilagut, Arnaq Grønvold oqarpoq.