Meeqqanik atornerluisartorpassuit Ukrainimit aqunneqarsimapput

Meeqqanik nunarsuaq tamakkerlugu atoqateqarniartartorpassuit, nunanit assigiinngitsunit 25-neersut, Europami Politiinit Suleqatigiinnit – Europolimit – ullumi paasineqarput. Inuit 2.500-t meeqqanik atoqateqarniartartutut peqataasarsimasut paasisaapput. Danskit qulit allallu nunanit allaneersut hunnorujut missaaniittut meeqqanik atoqateqarniartartutut paasisaallutik tigusaapput. Meeqqanik atoqateqarniartartut taakku Ukrainimiit aqunneqarsimapput, angutip italiamiup meeqqat ukrainimiut 21-t, qulingiluat 16-illu akornanni ukiullit, atoqatigisarsimavai, atoqatiginerallu filmiliarisarsimallugu. Rumæniamiunut meeqqanut atornerlunneqarsimasunut sanilliullugu uuma pisimasup allaassutaa apeqqutigineqarpoq.
novembarip 05-at 2007 17:21

Red Barnetip tarnip nakorsaatut atorfeqartitaa, Kuno Sørensen, oqarpoq, maanna pisimasup paasineqartup allaassutigigaa meeqqat atornerlunneqarsimasut kikkuuneri takuneqarsinnaammata, assimmi inernetikkut silarsuaq kaajallallugu siaruaanneqarsimammata. Soorunami pinerlussimasut kisiisa ujartussaanngilagut, timimikulli pinerluffigineqarsimasut nassaarisariaqarput, tarnillu nakorsaannut katsorsartillugit, meeqqat imminnut pisuutinnerat akisussaaffeqartutullu isiginertik katanniassammassuk. Meeqqat tarnikkut anniaatiminnut ilanngullugu sungiunniartariaqassavaat aamma eqqaajuartussaagamikku atornerlunneqarnerminniit assit qaqugumorsuaq nunarsuaq kaajallallugu meeqqanik atoqateqarniartartunit takuneqarsinnaasussaanerat. Meeqqanik atornerlunneqarsimasunik katsorsaaniarneq sivisuumik ingerlanneqartariaqartarpoq, imalu sivisutigisinnaalluni meeqqat inersimasunnguleraangamik namminnerlu atoqateqarnermik soqutigisaqaleraagamik kingumut misigisimasatik utersaartoortittaleraangatigit katsorsaasut pisariaqartinneqarnerulersarmataluunniit, Red Barnetimi tarnip nakorsaatut atorfilik, Kuno Sørensen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq