Meeqqanik atornerluisarneq akuerisaanngilaq
Nunatsinni meeqqanik atornerluisarneq, inuiaqatigiit akornanni sumiiffiit ilaanni annerusumik minnerusumilluunniit akuerisaasartoq, ippassaq Folketingimi eqqartuussiveqarnermut ataatsimiisitaliaami siulittaasoq, dansk folkepartiimeersoq, Peter Skaarup oqarpoq. Taamatut oqarneq Ilaqutariinnermut Inatsiseqarnermullu Naalakkersuisumit Aleqa Hammond-mit akerlilerneqarpoq.
- Tupigusuutigivara, politikeri taamak qaffasitsigisumik inissisimalluni isumaqartoq, nunatsinni meeqqanik sumiginnaasarneq akuerisaasuusoq. Soorunami sumiikkaluaraanniluunniit nunarsuarmi meeqqanik sumiginnaaneq akuerineqarsinnaanngilaq, tamanna aamma nunatsinni akuerineqanngilaq. Aamma paasinarpoq taassuma ilisimasai nunatsinnut tunngasut annikereerlutik taamatut oqariartuuteqarsimasoq, Aleqa Hammond taama naggasiivoq.
Sapaatip akunnerata tulliani, inatsiseqarnermut ataatsimiisitaliarsuaq nunatsinni ataatsimiissaaq, tassanilu danskit inatsiseqarnermut ministeriat Lene Espersen aamma peqataassaaq.
