RG-fabrikkiani sulisussaaleqisoqarmat matuneqarpoq
Nunaqarfimmi Aappilattumi Upernaviup avannaaniittumi Royal Greenlandip tunisassiorfia ukiup affaa matuma siorna atulersoq, matusariaqarsimavoq sulisussaaleqineq pissutigalugu.
Royal Greenland nittartakkamini Royalgreenland.gl imi taama allaaserisaqarpoq.
Royal Greenlandimit nlaunaarutigineqartut naapertorlugit Aappilattumi tunisassiorfimmut ulloq unnuarlu 15 tonsinik tunisassiortoqarsinnaavoq, qerititsivialu 130 tonsinik imaqarsinnaalluni.
Ulapaarfiup nalaani tunisassiorfik naliginniaasumik qulinik sulisoqarsinnaavoq maannakkullu taakkua amigaatigineqarput.
- Aappilattumi sulisuvut aalajaattaraluaqisut ajoraluartumik ulluni makkunani suliartunngitsoortarput, taamaammallu ulluni marlussunni matoqqasariaqarpugut, sulisorisinnaasavullu naammalerpata tunisassioqqissinnaalissaagut, Flemming Andersen Upernavimmi pigisaanilu tunisassialerinermik ingerlatsisoq oqarpoq.
Ingerlatsinermik pisortaq : Sulisussaaleqineq assut ilungersunarpoq
- Tunisassiorfimmik nutaaliaanerpaanik atortorissaarutitalimmik aningaasaliissuteqaqqammernitsinni sulisut suliartunngitsoornerat assut ilungersunarpoq, Flemming Andersen naliliivoq.
Aalisartut 20-t missaanniittut pisaminnik tunisisinnaannginnertik ilungersunaraat, tunisassialerinermik ingerlatsisoq oqarpoq, - Aalisartut pingasut tunisassiorfimmi suleqataanissaminnik neqeroorsimapput, tamannalu nuannaarutigisorujussuuarput sulisut tallimat-arfinillit amigaatigiuartillugit ajoraluartumik tamakkiisumik tunisassiorsinnaanavianngilagut, Flemming Andersen oqarpoq.
Aalisartut Aappilattumi tunisisinnaannginertik pillugu nunaqarfimmut qaninnermut Tasiusamut tunisiartortariaqartut KNR-imut oqaloqatigineqarput. Tasiusami tunisassiorfik amerlanerusunik tunisassiorsinnaavoq tassanilu sulisut amerlanerullutik.
Royal Greenlandimi sulisoqarnermi ingerlatsisoq Christian Laursen ilisimatitsivoq, sulisunik avataaneersunik sulisussarsiorsinnaaneq eqqarsaatigalugu inissaqartinneqarnissaanik suliniuteqartoqartoq.