Matusineq navianarluinnartoq
Nunatsinni najugallit pingasunngornermi ullaakkut iterput radio tv-lu attaveqanngitsut, mobilit, VHF radio aamma internet attaveqanngitsut anorersuarnerata kingoran Telep atortui akornuteqalermata.
Aalisartut allallu asimi angalasartut taamatut inissisimalissapput kortbølgemut mellembølgemullu nassitsissutit februarip aqqarnat matuneqarpata. KNR radio siunissami taamaallaat tusaaneqarsinnaalissaaq illoqarfinni nunaqarfinnilu FM-kkut nassitsissutit atorlugit.
- Radiokkut attaaveqaatinik matusiniarneq sinerissami inuiaqatigiit ulluinnarni attaveqaatitigut sullinneqarneranni inuiaqatigiillu akornanni pisunik malinnaanissamut pisinnaatitaaffinnik aalisartuniit piniartuniillu qularnanngitsumillu inuiaqatigiinniit mattusinertut isigineqarmat, KNAPKp siulittaasua Leif Fontaine allappoq.
Taanna isumaqarpoq kortbølgekkut mellembølgekkullu nassitsissutit qaqugorsuarmut nunatsinni pisariaqartinneqarumaartut.
- Taamaattumik Naalakkersuisut inussiarnersumik KNAPK-miit piumasaqarfigaavut radiokkut attaveqaatit pineqartut matuniarnerat unitseqqullugu, inuimmi inuunerat aningaasamiit pingaarnerutittariqarpoq, Leif Fontaine oqarpoq.
Attaveqarnermut pisortaqarfimmit aalajangiunneqarnikuuvoq kortbølgekkut mellembølgekkullu nassitsissutit matuneqassasut pisoqalillutik aserfallatsaalinerat akisoqimmat.
Sineriammi radio VHF aqqutigalugu silassamik nalunaaruteqartassaaq nalunaaqutaq 08.05, 12.05, 18.05 aamma 22.05.
