Maryp iluliarmiut meerartaat nuannisaqatigai
Ippassaq Saqqami silagissioreerlutik ullumikkut Ilulissat putsertoq Kunngissap nuliata malittaasalu pisussat nangippaat.
Tikeraarnermilu oqariartuutit pingaarnersaraat meeqqat toqqissisimanartumik peroriartornissaat qinngasaarunnertaqanngitsumik.
Atuarfik Jørgen Brønlund qinngasaaruttarneq akiorniarlugu suliniummik Kammagiittamik ingerlatsiffiusoq pulaaramiuk meeqqanit nuannaaqisunit ingiallorneqarpoq.
- Isumaqarpunga suliniutip tamanit tigulluarneqarsimanera soqutiginarlunilu iluarusunnartoq. Takuneqarsinnaavorlu suliniut meeqqat meeqqerivinni atuarfinnilu atugarissaarnerulernissaanut iluaqutaasoq, Kunngissap nulia Mary atuarfimmut pulaarnermi kingorna oqarpoq.
Pisussallu nanginneqarmata iligiiaarluni arpanneq aallartippaa arpannermilu peqataasut ujamissaannik Kunngissap nulia Mary agguaasuuvoq.
Tikeraarneq unnugu naggaserneqassaaq borgmester Jess Svane qaaqqusisoralugu nerersuaqatigiinnermik.
KNRimeersoq Oline Inûsugtok Olsen aamma sunngiffimmi assiliisartoq Bent Petersen ullaap tungaa pisunik assiliisaartuupput.
Unnugu radioaviisimi Qanoruumilu Maryp Ilulissaniinnera sammineqarumaarpoq.
