Mary Simon sakkortuumik naalakkersuisunut uparuaavoq
- Canada-mi nunap inuiisa qanoq pineqarnerat pineqartillugu Canada-mi naalakkersuisut qanganisarsiorpaluttumik ingerlatsiniartut killormullusooq pisarput, ICC ippassaq Alaska-mi Barrow-imi ammarneqarmat Mary Simon ilaatigut taama oqarpoq.
Mary Simon, qanittukkut Canada-mi inuit kattuffiannut ateqartinneqartumut ”Inuit Tapiriit Kanatami” siuttussatut qinigaavoq. Taassuma ilaatigut taakkartorpaa canadami naalakkersuisut silap allanngoriartornera pillugu iliuuseqarnianngippallaarnerarlugit. Kiisalu eqqillit Inuillu atugaasa pitsanngorsarneqarnissaannik pilersaarusiarsuup piviusunngortinnissaanut kinguarsaanerarlugit uparuartorlugit.
Mary Simon-ip nutaarsiassaqartitsivimmut CBC news-imut aammattaaq oqaatigaa nunap inuiinut sakkortuumik aalassassutaaqisumik FN-p nunap inuiisa pisinnaatitaaffii pillugit tapersersuiniarluni nalunaarsimanerigalua Canada-miut naalakkersuisuinit akuersaarneqarsimanngitsoq.
FN-p avammut nalunaarutaanut tassunga, tassalu nunap inuiisa pisinnaatitaaffiinik qajannaarinninnerulersitsisussaagaluamut, nunat 30-isut akornanni nunat marluk tassalu Canada Ruslandilu kisimik isumaqataasimanngillat.
- Naalakkersuisut apeqqutinut pingaarutilippassuarnut tusaanngitsuusaartuarpaatigut, Mary Simon ICC-mi peqataasunut inunnut 1500-nik amerlassusilinnut taama ilaatigut oqarpoq.
