Mary Simon: Kattuffiit tusarniaaviginissaat puigorsimavaat

Issittumi sikup aakkiartornera annikillisinniarneqassappat, silaannaap mingutsinneqarnerata annikillisinneqarnissaanik Canadami inatsisissamut siunnersuut naammanngilluinnarpoq.

Inuit kattuffii marluk, ICC aamma Inuit Tapiriit Kanatami, taama isumaqarput.

Inatsissamut siunnersuut naapertorlugu gassit silaannarmik kissatsikkiartortitsisartut Canadap ukioq 2050 nallertinnagu affaannanngortinniartussaavai.

- Tamannali arriippallaarsoraarput, Canadami ICC-p præsidentia, Duane Smith, nutaarsiassaqartitsivimmut CBC Newsimut oqarpoq. Issittumi silaannaq naalakkersuisut pilliutigaat, Smith oqarpoq.

Silaannaap mingutsinneqarnerata annikillisarneqarnissaa pillugu pilersaarutit annertunerit sukumiinerillu, Inuit Tapiriit Kanatami præsidentiata, Mary Simonip, aamma takorusuppaa, silaannarmik mingutsitsinnginnissamik nunat tamalaat Kyotomi isumaqatigiissutaat pillugu naalakkersuisut konservativiusut, tassa qanganisalerisut, erseqqissumik nalunaaruteqarnissaat aamma kissaatigalugu. Mary Simon aamma isumaqarpoq, inatsisissamut siunnersuutip suliarineqalinnginnerani inuit kattuffiisa tusarniaavigineqarnissaat naalakkersuisut puigorsimagaat.

Inatsisissamut siunnersuut naammassineqassappat canadamiut naalakkersuisui illuatungiliuttunit tapersersorneqartariaqarput.