Mary Simon Canadami Inuit Kattuffianni siulittaasunngorpoq

Mary May Simon Inuit Taperiit Kanatami præsidentiattut ullumi ivertinneqassaaq. Inuit Taperiit Kanatami naggueqatitta Canadami kattuffigaat, taassumalu suliassaasa pingaarnerit ilagaat naggueqatitta nunamik piginnittussaanermik Canadamik isumaqatigiissutaasa illersornissaa, isumaqatigiissutaasullu naapertorlugit ingerlanneqarnissaata qulakkeernissaa.

Mary Simon 1999-imiit 2001-imut Danmarkimi ambassadøriuvoq, Danmarkimi ambassadøriunermi saniatigut 1994-imiit 2003-mut issittumi attaveqarfinnut aamma ambassadøriulluni.

Canadap naalagaaffiani tatigisaasutut toqqagaanerit arlallit sioqqullugit, Mary Simon Quebec-ip avannaani Kangirsualuujuaq-mi inunngortoq, naggueqatigiit Inuit suliniaqatigiffiinik ataqqisaasutut toqqarneqartarpoq. Makivik Corporation-imi First Air-imik piginnittumi siulersuisunut ilaasortaasimavoq, Præsidentitullu aamma atorfeqarsimalluni. Inuit Taperiit Kanatami siulersuisunut ukiuni 14-ini ilaasortavoq siulittaasuuffigisimallugulu. ICC-imi 1986-imiit 1992-imut Præsidentiuvoq.

Mary May Simon Canadami nersornaasigaavoq Order of Canadamik, Quebec-imi National Order of Quebec-mik kiisalu Kalaallit Nunatsinnilu nersornaat kuultiusoq nersornaatigalugu. Canadami naggueqativut 50.000-it missaaniipput namminersorneruffiusunilu sisamani, amerlanerit najugaqarlutik.