Mary Simon aallartitatut toqqagaavoq

Mary Simon, Inuit Tapiriit Kanatami, præsidentiat, Canadami meeqqat peqqissuunissaannut aallartitatut Ottawami persuarsiornertalimmik pisortatigoortumik toqqagaavoq. Canadamiut nutaamik meeqqanut Ottawami nalunaarutiginninnerat Mary Simonip aamma atsiorpaa, Canadap peqqinnissaqarnermut ministerianit, canadamiut nakorsaannit, taavalu meeqqanut peqqinnissaqarnermut kattuffimmi sinniisuutitanit peqataaffigineqartumik. Nalunaarummi nutaami ilaatigut allassimavoq, meeqqat alliartornerminni, tarnikkut, timikkullu misigissutsikkut, aamma ilinniagaqarnissap tungaatigut ineriartortussaallutik pisussaaffeqartut, taamaattumillu kusanarnerpaamik, peqqinnissakkullu pitsaanerpaamik, tuniorarneqartariaqarlutik. Inuit eqqillillu meerartaat, canadamiut meerartai allat assigalugit, taamatut periarfissaqartitaallutillu pisinnaatitaaffeqartinneqartariaqartut, nalunaarusiap nutaap naqissuserpaa. Mary Simon, Radioaviisimut oqarpoq, politikikkut maannamiit suliniarnermini meeqqat peroriartorneranni atugarisaat sammineruniarlugit, meeqqat isumannaatsumik toqqissisimasumillu avatangiise-qarlutik peroriartortariaqarmata.