Mary panissaarpoq
Kunngissap nulia Mary rigshospitalimi ullumi panissaarpoq.
Ataatanngorlaaq kunngissaq Frederik Mary-p ernisunnerani najuuppoq. Prinsesse-aranngorlaarlugooq 3350 gram-inik oqimaassuseqarpoq 50 centimeterinillu angissuseqarluni.
Niviarsiarannguaq inoorlaaq taanna Danmarkimi kunnginngorsinnaasuni pingajuattut inissippoq, tassa ataataa kunngissaq Frederik siullertut inissisimavoq, taava aneeranngorlaaq Prins Christian tulliuvoq, pingajuattullu inoorlaavarannguaq taanna Dronninginngorsinnaasutut inissilluni.
Kunngissap nulia Mary maajip aallartilaarnerani aatsaat ernisussaasimagaluarpoq, ullaap tungaanili ernisulermat napparsimaviliaanneqartariaqarsimavoq.
Rigshospitalimi Mary-mut ernisussiuisussat ulluni kingullerni piareersimakannereersimapput, takkummallu erniffissaa piareersimareersimavoq.
Mary kingullermik ernigami aamma sapaatip-akunnerinik marlunnik sioqqutsilluni ernivoq. Oqaatigineqarporlu ini erniffia ini aappaluartumik taaneqartarsimasoq, taamaalillunilu prinsesse-aqqamut tulluarluinnarluni.
Inatsisartut siulittaasuat Jonathan Motzfeldt kunngissakkunnut pilluaqqussummik aamma nassitsisimalereerpoq.
