Martin Møller ukiuunerani OL-ertoqarnissaanut sungiusaleruttorpoq
Møller meterinik 1800-nik qatsissusilimmi sungiusarpoq, taamaallillu qatsissumi unamminissaq sungiunniassagamiuk. Sochimi unamminerit meterinik 1500-nik qatsissusilimmi ingerlanneqartussaapput. Martin Møllerip timimi qatsissumi unamminissamut, atsinnerusumi unamminermik allaanerungaatsiartumut, sungiussitinniarsarissavaa.
-Qaammatit kingulliit marluk ingerlanerini sapaatit-akunnerini tallimat meterinik 1.500-nik qatsitsigumiittumi najugaqarpunga, taamaammat piareersarluarsimasutut misigivunga. Qatsissumi najugaqarneq OL-imut peqataanissamut ilaaginnarpoq. Tamannalu aningaasaliisut ikiuulluarnerisigut iluatsissinnaasimavara, Martin Møller, pingaarnertut aningaasaliisumi Royal Greenlandip nittartagaanut taama nassuiaavoq.
Martin Møller OL-imut peqataanermini 50 km-inut sukkaniunnermi angusarissaarnissaminut periarfissagissaarpoq. Unammineq taanna OL-ip ulluisa kingullersaanni februaarip 23-iani pisussaavoq. Ukiuunerani OL Sochimi februaarip 7-iani aallartissaaq.
- Ukiamiit maannamut kiilunik marlunnik oqilivunga. Oqinnerusutut misigaanga OL-imilu unammiuarnerni sukkasuumik arpannissannut piareersimasorujussuartut misigisimallunga, Martin Møller oqarpoq.
