Kalaaleq ujakkaarluni ooqattaasartartoq Martin Møller Italiami Forni Avoltri-mi Europa Cup-imi ingerlalluarpaluppoq.
Aappariit Johanne Mikkelsen aamma Martin Møller Italiami Europa Cup-ertoqarnerani peqataapput, ingerlalluaraannilu nunarsuarmi pissartanngorniunnernut World Cup-imullu peqataasinnaasoqarsinnaalissaaq.
Martin Møller World Cup-imut nunarsuarmilu pissartanngorniunnissamut anngutereerpoq, aappanilu Johanne Mikkelsen ikiorniarlugu ulluni makkunani Italiami Forni Avoltri-miilluni.
Siorna juullingalersoq Østrigimi Europa Cup-ertoqartoqarpoq, Johanne Mikkelsen-ilu sekund-inik 16-inik sukkanerusimasuugaluaruni World Cup-imut nunarsuarmilu pissartanngorniunnissamut anngussimassagaluarpoq.
Ooqattaasarnerulli nalaani uniuisaqattaarnini pissutigalugu anngutinngitsoorutigaa.
Martin Møller aatsaat taama ingerlalluartigaaq, pingasoriarlunilu uniuigaluarnini anigorluarlugu.
Nunat tamat akornanni unammersuaqatigiinnernut peqataasartoq Norge-meersoq Egil Gjelland 30 sekundinik inulaarsimavaa, peqataasullu 92-iusut akornanni normu 32-tut inissilluni.
Nunarsuarmi pissartanngorniunnerit februaarip ulluisa pingajuanni aallartissapput, Italiami Antholz-imi pissartanngorniuttoqassagami.
