Martin Møller ilassilluarneqarluni tikilluaqquneqartoq
Martin Møller OL-imi peqataareerluni angerlamut tikimmat natersuaaqqamik aappaluttumik tummarfissalerlugu naasunillu tunillugu Elite Sport Greenlandip (ESG) tikilluaqquaa.
- Elite Sport Greenlandimiik nuannaarutigalugulu tulluusimaarutigaarput Martin Møller anguniagaqarusussuseqarluni sungiusarusussusikkut OL-eqarnissaata tungaanut iliuuseqarnera, kattuffik facebookimi quppernermini taama allappoq.
Martin Møller PyeongChangimi 50 kilometerinik isorartussusilimmi qangatut ujakkaarluni arfininngormat unammeqataavoq. Unammeqataareernermi kingorna ujakkaartartup, 37-inik ukiullip unammisartuunini taamaatillugu nalunaarutigaa.
Unammisartuunini kingumut qiviarlugu tulluusimaarutigisinnaagaa, ESG allappoq.
- Unammisartuunini sukataarusussuseqarluni, anguniagaqarnini kingumut qiviarluarsinnaavaa.
Martin Møller ukioq manna ukiuunerani OL-ertoqarnerani unamminerni marlunni peqataavoq. 15 kilometerinik isorartussusilimmi oqilaniunnermi normu 90-inngorluni apuuppoq, 50 kilometerinillu isorartussusilimmi qangatut ujakkaarnermi normu 60-inngorluni. Unamminerni marlunni angusai naatsorsuutigisaanit ajunnginnerupput.
Unammisartuunermi nalaani Sotjimi 2014-imi OL-ertoqarnerani ilaatigut 50 kilometerinik isorartussusilimmi oqilaniunnermi normu 45-nngorpoq, aammattaaq ujakkaarluni sukkaniunnerit nunarsuarmi sakkortunerpaartaanni, tassa Arctic Circle Racemi ukiuni arfinilinni tulleriinni ajugaanikuulluni.
