MARTI: Silap pissusaata allanngoriartornerani naggueqatigiit inuit naleqqusallaqqipput
Sapaatip akunnerata naanerani Katuamiippoq taakkulu sammillugit.
Nuummi kulturip illorsua Katuaq aprilip ingerlanerani MARTI'p assilisaanik saqqummersitsivoq, ateqartumik "Greenland Spirit". Arfininngormallu Marti Muellerip soqutigilluakkami aappaa, tassa silap pissusaata allanngoriartornera saqqummiussiffigaa.
MARTI'p ukiorpassuarni taanna soqutigisarisimavaa, allaat Københavnimi Naalagaaffiit Peqatigiit klima pillugu ataatsimeersuartitsinerani 2009-imi oqalugiartunut pingaarnernut ilaasimalluni.
15 gradenik kianneruvoq
- Inuit Kalaallit Nunaanniittut avatangiisimikkut malussalaareersimapput. Sumiiffiit ilaanni sikukinnerulersimavoq, aalisarnermut sunniutilimmik, appariarfiusumik imaluunniit pissusissamisut ingerlanani. Kisiannili nunarsuamioqatitsinnik inuppassuaqarpoq tamatuminnga paasinninngitsunik, Marti Mueller oqaluttuarpoq.
Assersuutitut taavaa ækvatori gradenik marlunnik kissappat, taava sikuiuitsoq avannarleq kujallerlu arfineq pingasuniit - femten gradet tikillugit kissassaaq.
- Taamaalippat naluusersortoqaannarsinnaavoq. Apeqqutaaginnalerporlu allaat silamiinnissamulluunniit kiappallaalersinnaammat. Soorunami nunami naatitsinissarluunniit siunissami qanoq sivisutigisumik ingerlatiinnarneqarsinnaanersoq apeqqutaalissaaq, sikup aakkiartuinnarnera allarpassuillu eqqarsaatigalugit, Marti Mueller oqarpoq.
Inuit naleqqussalleqinnerupput
Taannali isumaqarpoq naggueqatigiit Inuit silap pissusaata allanngoriartornera immikkut iluaqutigisinnaangaat.
- Nunap inoqqaavisa kulturiat eqqarsaatigalugu, naggueqatigiillu INUIT eqqarsaatigalugit nunarsuarmioqatitsinnut allanut naleqqiullusi inuuinnarnissamut periarfissaqarluarneruvusi. Naleqqussallaqqissuugassi, klimallu allangorneri arlallit aqqusaareerimallugit. Maanna ornitagut eqqarsaatiginagit. Nassaarsiullaqqissuusariaqarpormi, pisariaqartillugulu ikittunnguakkuutaarlusi inuusinnaangassi, Marti Mueller oqarpoq.
Aamma atuaruk Kalaallit anersaavat unnersiutigineqartoq
Katuami oqallissaarummik saqqummiussinermi saniatigut, Marti Mueller arfininngormat oqallissaarummik allamik saqqummiussaqarpoq.
Tassa Burning Man pillugu - inoqajuitsoq pillugu saqqummiussigami, Nevadap inoqajuitsuani ukiut tamaasa pisartoq Black Rockimi assilisarsimasaminik takutitsillattaajutigaluni saqqummiussigami.