Martha Labansen: Iliuusissanik pilersaarusiortarput

-Angajoqqaat meeqqallu ajornartorsiuteqarpata taava kommunip pisussaaffigivaa ikiorsiissalluni. Inuunermi nalunngilarput iliuusissat ilaatigut imatut piaartigisumik iliuuseqarfigisariaqartartut pappiaqqat kingulliutinneqartariaqartarlutik, Martha Labansen oqarpoq.

Taamaattumik tupigusuutiginngilaa iliuusissatut pilersaarusiat ulloq taannarpiaq ullulluunniit 14-it qaangiukkaangata aatsaat suliarineqaraangata. Suliarineqassaqqaarmata.

Meeqqanik inussuttunillu ikiorsiisarneq pillugu Inatsisartut peqqussutaat nr. 1. 15. april 2003-meersoq atuutilermat peqqussutaalerpoq, kommunalbestyrelse meeqqap angerlarsimaffiup avataanut inissinneqarnissaanik aalajangiitinnagu iliuusissanik pilersaarusiaq suliarineqariissasoq. Aalajangiinissarlu tuaviuussaasimappat pilersaarusiaq kingusinnerpaamik ullut 14-it qaangiutsinnagut suliarineqassasoq.

Siunertaavoq meeqqamut inuusuttumullu siunertaqarluartumik suliniuteqarnissap qularnaarnissaa.

- Iliuusissamik pilersaarusiortoqanngikkaangat meeqqat, angajoqqaarsiaagut angajoqqaaviusullu maleruagassaqarneq ajorput.

- Meeraq sumiginnagaasoq sumiginnaqqillugu uagutsinnut angajoqqaarsiaasunut artornartuuvoq, angajoqqaarsiat peqatigiiffianni siulittaasuugallartoq Elisa Berthelsen taama oqarpoq.

Kommunit sapinngisartik tamaat ajunnginnerpaaq anguniarlugu suliniartartut, Kommuneqarfiit Kattuffiani KANUKOKA-mi pisortaq Martha Labansen oqarpoq.

- Uanga isumaqanngilanga handleplaniliorneq ulloq ataaseq kingusinnerusukkulluunniit suliarineqarnera meeqqap sumiginnagaaqqinneranik oqarnermut aallaaviussasoq. Uani pingaarnerpaajuvoq suleqatigiittussat kommune, angajoqqaat meeqqamillu paarinnittussaq – ulloq unnuarlu angerlarsimaffiugunik ilaqutariiugunilluunniit – tamarmik peqataanissaat. Tamarmik pisussaaggifivaat suleqatigiilluni meeqqamut naleqqunnerpaamik iliuuseqarnissaq, Martha Labansen erseqqissaavoq.

Taamaammat angajoqqaarsiat peqatigiiffiata uparuaanera pissutissaqarsorinngilaa.

- Ataasiinnaq tikkuarlugu tamanut atuuttumik uparuaasoqarsinnaanngilaq. Ilaatigut ingerlaannaq iluatsitsisoqartarpoq ilaatigullu pisariaqavissumik kingusinnerusukkut suliassaq ingerlattariaqartarpoq, Martha Labansen naggasiivoq.