Marlunngorpamit timmisartuussisoqalissangunarpoq
Qallunaat Nunaanni timmisartuussinissat tamarmik aqagu ullaakkut nalunaaqutaq arfineq-pingasunut kinguartinneqarput, timmisartortitsileqatigiiffiulli SAS-p aqagumut timmisartuussinissani tamaasa taamaatereersimagai, DR-mit oqaatigineqarpoq.
Qallunaat Nunaanni timmisartuussinissat kinguartinneqarmata tamanna nunatsinnut aamma sunniuteqarpoq.
Imarpik qulaallugu timmisartuussinissat Air Greenlandimit arfininngornermi unitsinneqartut, Air Greenlandimi aqutsisut ualeq manna ataatsimeereerlutik taama nalunaarput.
Imarpik qulaallugu apriilip 23-iat ilanngullugu angalasussaagaluartut billitsisitik kingusinnerusukkut pisiffigisaminni allanngortissinnaavaat imaluunniit utertissinnaavaat.
Air Greenlandillu nunatta iluani timmisartuussinissani ingerlatiinnartussaagaluaraa imarpik qulaallugu angalaniartunut billitsinik tuniniaaneq apriilip 30-ata tungaanut matuneqarallarpoq Kastrupimiillu nassiussanik tigooraasoqarunnaarluni.
Imarpik qulaallugu timmisartuussinissat unitsinneqarmata ilaasussat 900-t missaanniittut eqqungaapput, tamatumalu saniatigut nassiussat 30 tonsit missaanniittut Københavnimiillutik.
Ilaasussat ingerlariaqqinneq ajuleqqasut saaffigisinnaasaannik periarfissaqartikkumallutik oqarasuaatikkut saaffiginniffiusinnaasumik Air Greenland pilersitsivoq, saaffiginnittarfik ullumikkut unnugu nalunaaqutaq arfineq pingasut tungaanut ammatinneqassaaq. saaffiginnittarfiullu normoraa 34 33 35.
Ilaasussat Air Greenlandip nittartagaani www.airgreenland.gl -mi nalinnaasinnaapput, sulisullu uunga allaffigineqarsinnaallutik: kontakt@airgreenland.gl -mut.
