Marlukkaarlutik angalasarusunngillat

- Umiarsuit Nunatta sineriaani angalasut, angallaviit aalajangiussaareersut aqqutigalugit angalasarput, tassami angallaviit taakku isumannaannerpaatut innersuunneqareermata, Albatros Travelip issittuni angalanissanut pilersaarusiortua Michael Hjort oqarpoq.

Taassuma umiarsuit arlallit illoqarfinnut nunaqarfinnullu ataatsikkut tikittarnerat apeqquserpaa.

- Kikkut tamarmik ilisimalereersimassajunnarsivaat, umiarsuit arlallit, soorlu Qaqortumut imaluunniit Ilulissanut ataatsikkut tikikkaagata qanoq illoqarfiit tikitat innuttartigisut. Takorlooriarsiuk umiarsuit arlallit nunaqarfinnut tikittalissappata, tamaani qanoq issanersoq. Tassalu tamanna uagut pinngitsoorusunngisarput, Michael Hjort oqarpoq.

Umiarsuit takornariartaatit marlukkaarlutik issittup imartaani angalasarnissaat pillugu Naalagaaffiit Peqatigiit Imaani angallannermi suliniaqatigiiffiata, IMO-p peqqussutaa , malinneqassasoq Imarsiornermut Qullersaqarfimmit innersuussutigineqarpoq.

Nunatta ilaani sumiiffinni avinngarusimasuni aamma Tunup ilaani, umiarsuit marlukkaarlutik angalaqatigiittarnissaat akornutissaqartinnagu Michael Hjortip oqaatigaa.

- Kisiannili umiarsuit takornariartaatit ima atortorissaartigaat, allaat sikorsuit ungasianiit sumiissusersineqarsinnaallutik ingerlaarfigineqarsinnaanngikkaangatalu allamik aqqutissarsiortoqarsinnaalluarluni utiinnanngikkaanni. Paasisinnaavarali sillimaniarneq pillugu maanna pilersaarusiortoqalermat. Angallatilli minnerit atortorissaarpianngitsullu pingaartinneqarnerullutik sullinneqarnissaat uanga pilerinartinneruvara. Umiarsuimmi angisuut isumannanngimmata, Michael Hjort taama oqarpoq.

Immap itissusaanik uuttortaanerit nutaat maanna pisariaqalersimasut Michael Hjortip taakkartorpaa

- Aamma taamaaliortoqarnissaanut aningaasaliisoqarnissaa kissatiginarpoq tassami taamaaliornikkut imaani angallanneq isumannaannerusoq pilersussaammat, Michael Hjort oqarpoq.

Imarsiornermut Qullersaqarfik, Kangilinnguani Sakkutooqarfik aamma DMI umiarsuit isumannaatsumik angalasarnissaat siunertaralugu suliniummi suleqatigiipput.