Ukkusissani illup ikuallannerani marluk allat ajunaarsimanissaat ilimagineqartoq
Inuit marluk allat Ukkusissani illup tallimanngormat ikuallanneranut atatillugu ajunaarsimanissaat ilimagineqarpoq.
Ikinnerpaamik ataaseq ajunaarsimasoq Kalaallit Nunaanni Politiit tallimanngornermi nalunaarutigaat.
Inersimasut marluk meeqqallu ataatsip ajunaarsimanissaat ilimagineqartoq, politiit tusagassiuutinut arfininngornermi nalunaaruteqarput.
- Politiilli ilimagisaq ilumoornersoq paasiniarlugu misissuinerit suli allat naammassinissaat utaqqivaat. Politiit ajunaartut pillugit annerusumik maanna oqaaseqarusunngillat, politiit allapput.
Qanigisaasut ilisimatinneqareerput.
Pingasut ajoqusersimasut
Tallimanngornermi ullaakkut ikuallattoqarpoq, politiillu qatserisartullu ornigullutik.
Ajoqusersimasut pingasut qimagussorneqarput Nuummilu maanna napparsimmavimmiillutik.
Nuummit Ilulissaniillu politiit suliami misissuiartorlutik nunaqarfimmukarsimasut Kalaallit Nunaanni Politiit paasissutissiipput. Aamma pinerluttulerinermi misissuisartunik toqusimasumillu misissuisartumik Danmarkimit aggersaasoqarpoq.
Suna ikuallannermut peqqutaanersoq suli ilisimaneqanngilaq.
