Marloriarlutik mianersoqquneqaraluarsimapput
Ilaqutariit Danmarkimeersut umiatsiamik angalaartillutik ujajaanianit Somaliameersunit tigusarineqartut, Sakkutuut imarsiortut qullersaqarfiannit marloriarlutik mianersoqquneqarsimagaluarput, ataataasulli mianersoqqussut soqutigisimanngilaa.
Allattoq Mads Lynge
Ilaqutariit Somaliap sineriaanut taama qanitsigalutik angalanissaannut qaammataasiat atorlugit attavikkut mianersoqquneqarsimagaluarput.
Ekstra Bladetip nittartagaani taama allaaserinnittoqarpoq.
Umiatsiap tingerlaataannallip Somaliamut taama qanitsigaluni angalaarsimanera, umiarsuaatileqatigiiffinnit arlalinnit tupigusuutigineqaqaaq, qallunaammi umiarsuaataat Somaliamut taama qanitsigalutik angalannginnissaat ukiorpassuarni kajumissaarutigineqartarsimavoq.