Markus Olsen: Kulturi iluatsinngilaq!

Nunatta Radioata aallakaatittagaat pillugit oqaatsinut politikkeqartoqartariaqalerpoq, qallunaatullu qaammarsaanerit nutaarsiassaqarnerlu KNR-ip nittartagaa atorluarlugu saqqummiussisoqaannartariaqaleraluarpoq, ilaatigut taamatut oqarpoq Inuiaqatigiilerinermi oqallissaarillunilu qaammarsaanermik suliniaqatigiiffimmi INUISA-mi siulittaasoq Markus Olsen, taanna KNR Avannaani suleqatitsinnut Else Løvstrømimut Nunarput Ullumimi taama ilaatigut oqarpoq.

- Namminersornerullutik Oqartussat pileqqaarmat kultureqarneq, ilinniartitaanerlu siulliullugit akisussaaffigineqalerput, taamaakkaluartoq tamanna iluatsissimanngilaq. Ullumikkumummi allaat assersuutigalugu oqaatsinut politikkeqannginnerup saniatigut nunarput kulturimut politikkeqanngilarluunniit Markus Olsen oqarpoq, nangipporlu.

- Kalaallit Nunaata Radioa kalaalinngorsaanerup nalaani qallunaatooraluttuinnarpoq. Aallakaatitassanut tunngatillugu pitsaasunik suliaqarnissamut, kulturerpullu aallaavigalugu pitsaasumik samminnilluni sukumiisumik suliaqarsinnaaneq eqqugaavoq. Taamaattumik tamakkua pillugit akisussaasut oqaatsinut politikkiliortariaqarput.

Maanna oqaatsigut kalaaliussuserlu pilliutigalugit toqqaannartumik aallaakaatitsinermi qallunaatuunik aallakaatitsigaluttuinnartoqarpoq Markus Olsen Nunarput Ullumimi ilaatigut taama oqarpoq