Maqisoorfimmut miligutileerialerput

Uuliasioqatigiit BP, Mexicop kangerliumanersuani uuliamik mingutsitsineq annerulinnginniassammat uuliap maqisoorfiata nalaanut miligutissarsuarmik nutaamik ikkusserialersoq, BP-p pisortaanera Tony Hayward nutaarsiassaqarfinnut nalunaarpoq.
Allattoq Najaaraq Egede
maajip 11-at 2010 08:32

"Nalunaaquttap akunneri 72-it qaangiutsinnagit" miligutissaq ikkuteriassavaat. Maannami ullup unnuallu ataatsip ingerlanerani uulia akuiarneqanngitsoq 800.000 liiteri Mexicop kangerliumanersuanut seerisarpoq.

BP-p siusinnerusukkut saviminingaalluk militsissutissaq 100 tonsimik oqimaassusilik ikkuteriaraluarpaa, iluatsinngitsumilli. Saviminersuaq taanna aamma milluaatilerneqarsimagaluarpoq uuliamik aniasumik ruujorersualigaasimallunili. Talartiusarsuarli sermersoortaqattaarmat atorsinnaasimanngilaq. Maanna saviminersuaq minneq aminnermillu milluaatilik atorlugu iluatsitserialerput.

Uuliamik qillerussuaq Deepwater Horizon, USA-p kujataani Louisiaanap sineriaata avataanit 80 kilometerinik avasitsigisumiittoq qaartoortoqarnerata kingornagut apriilip 22-ani kivivoq. Ajutoornermi inuit aqqanillit ajunaarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq