Maqisoornerup unitsinniarneranut atorneqartussat tassaapput ruujorit ventiilillu 75 tonsit. Immallu naqqata iluaniit naqitsineq ima sakkortutigisinnaavoq, allaat qillerivik aserorneqarsinnaalluni uulialu maqisoq unitsinneqarsinnaajunnaarluni, nittartakkami politiken.dk-mi taama allaaserinnittoqarpoq.
Taamaattumik Amerikami oqartussat periaaseriniarneqartoq marlunngormat unitsippaat, ajutoortoqarsinnaanera iluamik paaseqqaarusunneqarmat. Naak suliap ingerlateqqinneqarnissaa naalakkersuisut ullaarli akuerereeraluaraat, misiliinissaq kinguarteqqinneqarpoq.
Tassami misiliummi paasineqarmat, ventiilit katiguffiini slangit ilaat putoqartoq. BP-mit slangi iluarsaanneqarpoq, maqisoornerullu ullumikkut unitsissinnaanissaa suli naatsorsuutigineqarluni.
Taamatut misiliinissap unitsiinnarneqarnissaa, immikkut ilisimasallit ilaasa BP-mut kajumissaarutigereerpaat, qaammatillu tulliani maqisoorneq unitsinniarlugu qillerinissat utaqqimaaqquneqarlutik. Unitsitsiniarluni qillerinertigut, qillerivik maanna maqisoortoq sanerakannianiit qilleriffigineqarsinnaavoq taamalu maqinera unitsillugu.