Maniitsup Katersugaasivia unnummi kulturisiorfimmi pulaarneqarluarpoq
Aammattaaq katersugaavisiup aalajangersimasumik saqqummersiitaasa saniatigut katesugaasiviup iluani illoqarfimmiut eqqumiitsuliaannik pinnersarneqarsimavoq. Qatanngutigiit Lauritz, William aamma Jakob Jessen pinnersaasuupput.
Pulaartut aamma Maniitsup illoqarfittut oqaluttuarisaanera pillugu atuakkiamik, ulloq taanna iluatsillugu immikkut akikillillugu tuniniakkamik pisisinnaasimapput.
Katersugaasiup kaajallariaani sermimik naneruusersukkanik qaammaqqusersuisoqarsimavoq, katersugaasivimmilu kaffimik, tiimik, paarnap isseranik kaageeqqanillu sassaalliisoqarpoq. Katersugaasivik Unnummi kulturisiorfimmi 120-t missaannik pulaartoqarpoq.