Maniitsup eqqaani rubinimik misissuisoqarnissamut innuttaasut tusarniarneqarnissaat pisariaqartinneqanngilaq
![](/sites/default/files/styles/image_934x467/public/article_images/rubin_3.jpg?itok=QvUApgGi)
Tamaattumik pisortatigoortumik tusarniaasoqanngilaq. Taamaattorli Naalakkersuisoqarfiit, Namminersorlutik Oqartussani aqutsisoqarfiit aamma kommunit tusarniaaffigineqarput, taama nassuiaateqarpoq Jørgen T. Hammeken-Holm Aatsitassanut pisortaqarfimmeersoq.
Aatsitassarsioqatigiiffik True North Gems Maniitsup eqqaani sisortarfiusimasup Apussuit eqqaani rubininik misissueqqaarnissaamut Naalakkersuisunit siorna akuerineqarpoq, misissueqqaarnissamut akuersissut ukiunut tallimanut atuuttussatut siullermik akuerineqarluni.
AAMMA ATUARUK Apussuit eqqaani rubinimik misissueqqissaarnissaq akuersissutigineqarpoq
Namminersorlutik Oqartussani aqutsisoqarfiit, pisortaqarfiit kommunillu tusarniaanermi peqataapput. Kattuffiit, peqatigiiffiit suliniaqatigiiffiillu tusarniaanermi tusarniaaffigineqanngillat.
Aatsitassanut Naalakkersuisoqarfik isumaqarpoq, misissueqqissaarneq soqutigisaqaqatigiinnut allanut sunniuteqarnavianngitsut.
Suliniutip angissusaa apeqqutaatinneqartoq
- Misissuineq annertunerusimasuuppat pisortatigoortumik tusarniaaneq pisimassagaluarpoq, Jørgen T. Hammeken- Holm Aatsitassanut Naalakkersuisoqarfimmeersooq nassuiaavoq.
Misissuinissamut akuersissut Naalakkersuisunit akuerineqartoq, KANUKOKA-mit aamma Qeqqata Kommunianit politikkikkut oqallisigineqarnissaa piumasarineqarpoq.
Rubineqarneranik misissuiffigineqartussap eqqaani Kangerluarsuup kangerluata qinnguata eqqaani eqalunniartarfeqarpoq aamma tuttunniartarfiuvoq kiisalu Apussuit siornatigut sisorartarfiulluni.
Qeqqata Kommuniani politikkikkut oqallisigineqarneranut inerniuliunneqartoq pillugu oqaaseqartitsiniarsimagaluarpugut tamannali iluatsissinnaasimanngilarput, kommunip aatsitassanut ataatsimiititaliaanit taamatullu kommunip aatsitassat pillugit ataqatigiissaarisuanit.
Misissueqqissaarnissaq akornutissaqartinngilaa
Qeqqata Kommuniani Aatsitassanut Attaveqaqatigiinnermullu ataatsimiititaliami siulittaasup Gideon Lyberthip misissueqqaarnissaq akornutissaqartinngilaa.
- Assaat atorlugit misissueqqaarneq ingerlanneqassaaq. Qaartiterisoqassanngilaq aamma nuna innarlerneqassanngilaq, Gideon Lyberth oqarpoq
Taanna kingusinnerusukkut annertunerusumik oqaaseqarniarluni neriorsuivoq, misissuinissamut kommunip politikkikkut isummernera pillugu.
Aalisarnermut piniarnermullu Naalakkersuisoqarfik misissuinissamut tusarniaanermi annertunerusunik oqaasissaqarani akissuteqarpoq. Taamaattorli Peqqissutsimut Attaveqarnermullu Naalakkersuisoqarfik tusarniaanermut akissuteqarnermini peqqinnissaqarfiup kiffartuussisinnaanera apeqquserneqarpoq.
Apussuit eqqaanni misissuisoqarnerani peqqinnissaqarfiup sullissisinnaaneranik assartuisoqarsinnaaneranillu pisariaqartitsineq nalilersorneqarusuppoq. Ukioq naallugu najugaqarfiusuni aamma Kalaallit Nunaanni najugaqartutut allattorsimasut peqqinissaqarfimmit kiffartuunneqarnissaannik assartorneqarnissaannillu pisussaaffeqarmat.