Maniitsumi sulisut arlallit ajutoorput
Minnerpaamik inuit sisamat gassimik ulorianartumik najuussuisimanerisa kingorna taakku Nuummut napparsimmavissualiaanneqassapput, minnerpaamillu inuit allat 39-t Maniitsumi nappasimmavimmi misissorneqassallutik immaqalu taakku aamma Nuuliaanneqassallutik.
Maanakkorpiaq timmisartoq nakorsanik peqqissaasunillu ilaasoqarluni Maniitsumut mippoq.
Dronning Ingridip napparsimmavissuani sulisut piareersimapput ikinnerpaamik inuit 30-t misissugarinissaannut, taama nalunaarpoq Peqqinnissaqarfimmi pisortaaneq, Ann Birkekær Kjeldsen.
- Pisoq erloqinarpoq aammali erloqinarnerulersinnaalluni napparsimalersimasut misissorneqajaanngippata, Ann Birkekær Kjeldsen oqarpoq.
Ajutoorneq pivoq ualeq manna, Brugsenip naqqa silikonimik immersortillugu, sanasut, pisiniat Brugsenimilu sulisut ajutoornermi eqqugaapput, taama paasissutissiivoq Ann Birkekær Kjeldsen.
Peqqinnissaqarfimmi sulisut maanna Danmarkimi toqunartunik najuussuinermik ilisimasallit attaveqarfigereerpaat, taakkulu oqarput, toqunartoq najuussorneqarsimasoq puammi aseruunniinngussinnaasoq. Tamatuma kingunerisarpaa anersaartorniarnerup ilungersunarsineranik kissarneqarnermillu, taamaattumillu misissortinnissaq pisariaqassalluni.
Dronning Ingridip Napparsimmavissuata nalunaarutigaa, napparsimasunik misissugassanik taama amerlatigisunik takkutoqarnissaanut piareersimallutik aammalu atortoqarlutik, nalunaarutigineqarporli atortut naammanngippata Islandimi napparsimaviit suleqatigineqarsinnaasut.
Maniitsumi timmisartoqarfiup aqqutaa napparsimmavimmiit maanna pisortani sulisunit assersorneqarpoq, ambulancenik ingerlavigineqaleruni assersuisoqaqqunagu. Taama nalunaarput Maniitsumi Akisuasoq Media.
