Maniitsumi qaartartumeerinissamik sioorasaarisoqaqqippoq

Politiit nalunaarput Maniitsup mittarfia ippassaq nalunaaqutaq 13.00 qaartartumeerinissamik siorasaarneqaqqissimasoq.

Timmisartumut ilaasussaq, angut 60-it missaannik ukiulik, tunniussiniartilluni mittarfimmi sulisunut qaartartunik eqqartuilersimavoq, tamannalu mittarfimmi sulisut politiinut nalunaarutigisimavaat.

Angut tigusarineqarpoq killisiorneqareernermilu kingorna iperarneqaqqilluni. Angut kingusinnerusukkut unioqqutitsinerminut akiliisinneqarumaarpoq.

Maniitsumi politiit ilisimatitsipput mittarfik minutsit 20-it missaat matoqqatinneqarsimasoq.

Vicepolitimesteri Morten Nielsen oqarpoq pissusissamisuunngilluinnartoq timmisartorniartilluni qaartartunik eqqartuinissaq.

Maniitsup mittarfiani kingullermik maajimi qaartartumeerisoqarnissaanik siorasaarisoqarpoq.

Taamani angut nassataminik tunniussiutigaluni kuffertimini qaartartuuteqarnerarluni oqarpoq. Taamanikkut politiit mittarfik matugallarpaat.