Maniitsumi piniartut puisit neqaannik tunisisinnaanngorput

Tunitsivittaaq Greenland Lipid ukiut arlerlugit pilersaarusiugaareerluni piviusunngortinneqarpoq. Piginnittuuvorlu Nunatta Ammerivia. Greenland Lipidip aqutsisuata Kim Lyberthip iluarisimaarpaa piniartut tunitsiviullu tapertariilernerat.

Piniartut puisittatik erlaviiginnartarpaat, suliassallu sinnera uagut isumagisarparput; neqaa aggoriarlugu niuertarfinnut Nunatsinniittunut Danmarkimilu pisisartunut nassiussuuttarparput.

Neqaa pujoortarparput, panertillugu, suaasaligassanngorlugu, siatassiaralugulu nioqqutissiarisarparput, piumaneqaqaarlu. Piniartut puisimik ilivitsumik tunisinerminni 55 koruuninnattarnerat annikinneqarnerarsinnaagaluartoq, taamaattoq suli tuniniaavimmi tunisinissaminnut periarfissaqartuarput, tunisinnaanngisaammi uagut pisiarisarpavut. Tunitsiviulernerput piniartut piffissartornerinut oqilisaataavoq. Siusinnerusukkut tunisinnaanngisatik iginngikkunikkik kiversaannartaraluarpaat.

Siusinnerusukkut pilersaarutaagaluamut Puisi A/Simut taartigissallugu una ajunngilluinnartuusoq, Greenland Lipidimi aqutsisoq Kim Lyberth oqarpoq.

Greenland Lipidip siunniuppaa sinerissami illoqarfiit puisip neqaanik pilersornissaat, ukioq mannalu Paamiut pilersorneqalissapput.