Maniitsumi paggittut
Sapaatip ullaassaani imerniartarfiup matoreernerata kingorna, nalunaaqutaq 03.35 politiit imerniartarfimmukartariaqarsimapput. Imerniartarfiup silataani inuit arlalissuit paggisilersimapput qujanartumilli annerusumik ajoqusertoqanngilaq.
Pagginnermut peqqutaasinnaasumik aamma paasisaqartoqanngilaq.
-Imigassartungaatsiareernerup kingunerisaanik pagginnerit aallartinneqarsinnaasarput, sunali aallartissutaasimanersoq paasinngilarput, Niels Tønnessen Maniitsup politiiviniit knr.gl-mut taama oqarpoq.
Pagginnernut amerlasuut peqataapput, taamaattumillu Politiit oqaatigeqqissaarsinnaanngilaat qasserpiaat peqataasimanersut.
Angerlarsimaffinni eqqissiviilliornerit, sapaatip akunnerata naanerani Maniitsumi amerlasimasut Niels Tønnessenip oqaatitigaa, qujanartumilli meeqqat eqqissiviilliornerni eqqugaasimanngitsut oqarluni.
