Maniitsumi ikuallattoqarmat inuit marluk ajunaarput
Maniitsumi inissiaqarfiit ilaanni Annertusumi ippassaq ullaakkut ikuallattoqarmat inuit marluk ajunaarput, inuillu arfineq-pingasut chokimut suliaritillutik putsumillu najuussuisimasutut Maniitsup napparsimmaviani aamma misissorneqarlutik. Tamarmik napparsimmavimmiit angerlartitaasinnaasimapput.
Allattoq Mads Lynge
juunip 29-at 2012 06:53
Inuk ataaseq ikuallannermut atatillugu politiinit tigummigallagaasoq, Nuummi politimestereqarfimmi allaffissornermi pisortap, Claus Risbjergip, radioaviisimut ilisimatitsissutigaa.
Inuk taanna ikuallatsitsisimasutut pasineqassanersoq, inatsillu tunngaviusoq naapertorlugu killisiorneqassanersoq suli ilisimaneqanngilaq.
Ikuallarujussuartoqarnerani ajunaartut aqqi politiit saqqummiukkusunngikkallarpaat, ilaqutaasut tamarmik suli ilisimatinneqarsimanngimmata.
Ikuallanneq misissuiffigineqaleruttorpoq, ikuallannermut suna imaluunniit suut pissutaasimasinnaanersut misissorneqarlutik.
Ajunaartut timaat aamma misissorneqarput, toqqutigisaat pasiniarlugu.
