Maniitsumi akileraarutaasartoq 43 procentiuinnassaaq

Maniitsup Kommuneani aappaagumut aningaasanik missingersuutit kommunalbestyrelsemit akuersissutigineqaqqammerput, akileraarutigineqartullu allannguuteqaratik katillutik 43 procentiuinnarnissaat siunnerfigineqarluni.

Maniitsup borgmesteriata Søren Lyberthip, tamanna ima nassuiaatissaqartippaa:

- Taamaalilluta sinneqartoorfittut inissittussanngorluta naatsorsuutigaarput, 2,3 millioni koruuninik sinneqartoornissarput, Søren Lyberth oqarpoq.

Naak sinneqartoornissamik siunnerfeqaraluartut, Maniitsup Kommuneata aalajangiusimavaa Atammimmi meeqqeriviup matuneqarnissaa. Søren Lyberthip tamanna ima nassuiarpaa:

- Ammatikkusuunnarsimagaluaqaarput tamatta, kisianni meeqqerivik taama akisutigisoq ammatiinnarneqarnissaa eqqartorsimavarput, akisussaaffeqassaguttalu meeqqat tallimat eqqarsaatigalugit 1 millioni 73.000-it atortuaannassanerigut apeqqusertariaqarput.

Taamaammat dagplejerinik marlunnik pilersitsinikkut akikinnerusumik ingerlatsinissarput siunnerfigaarput, Søren Lyberth naggasiilluni oqarpoq.

Aningaasat 163 millioni koruunit aappaagu kaaviaartinneqarnissaat Maniitsup kommunalbestyrelsiata siunnerfigaa.