Maniitsormiut ulloriarsiornissamut periarfissarissaalerput

- Qinngussuaq Tysklandimut nammineerlunga sapaatip akunnera kingulleq aavara. Qinngussuaq taanna nunaqqatitta tamarmik atortassavaat. Kisianni meeqqat atuisissallugit pingaarnerpaapput, taakkuummata ulloriarsiornermik soqutiginnilersussat, Ulrik Augustussen oqarpoq.

Sila erseqqaritsinnagu qinngussuaq atorneqarsinnaanngikkallartarpoq, taamaaligaangaallu iikkamut seqersittakkat atorlugit Ulrik Augustussen ulloriarsiornermut tunngasunik oqalugiartarpoq.

- Ulloriarsiorneq inuusuttunit soqutigineqartorujussuuvoq, ullorissat nunarsuillu isiginnaassallugit soqutigineqaqaat. Seqinerpassuit, galaksit nuiaasarsuillu qinngussuaq atorlugu isiginnaassallugit siunissami soqutigineqassaqaat, Ulrik Augustussen oqarpoq.

Taassuma qularinngilaa meeqqanut inuusuttunullu ajortumut saaqqajaasinnaasunut ulloriarsiorneq pinaveersaatitut atorneqarsinnaassasoq.

- Ataasiarlunimi avataarsuata tupinnassusia takusimagaanni inuunerup sinnerani atasarami, Ulrik Augustussen Qanoruumut oqarpoq.