Maniitsormiut A/S INI-mut akiitsukinnerpaapput
INI A/S-mut akiitsullit 5.000-it missaanniipput. Maniitsormiut akiitsukinnerpaajusut, Nuummiut akiitsoqarnerpaajupput 10,5 millioninik INImut akiitsoqarlutik, Allan Werge INI A/S-meersoq oqaluttuarpoq.
Sisimiormiut akiitsoqarnerpaani tullersortaapput INImut akiitsui 9 million kronit missaanniillutik.
Innuttaasut kommunini tamaneersut INIp akiitsunut allassimaffianni allassimasuupput. Maniitsumeersulli ikinnernik INImut akiitsoqarput.
Paasinarporlu Maniitsumi INI, kommune politiillu immikkut illuinnartumik suleqatigiilluartut. Ataavartumik allanngujaatsumillu suleqatigiinnissaq anguniarlugu politeeq aaliangersimasoq akiitsulinnik suliaqarpoq. Taannalu Peter Simonsenimik ateqarpoq qanorlu suleqatigiinnerlutik ima nassuiaatigaa:
Qaammatikkaartumik kommune, INIlu politiillu ataatsimeeqatigiittarput, isumaqatigiissutigalugulu piffissami aggersumi suliassat qanoq pineqassanersut. INIlli aaliangertarpaa kikkut anisitaassanersut, anisitsinermilu suna tamarmi pissusissamisut ingerlanneqarnersoq qulakkeerniarlugu politiit najuuttarput, Peter Simonsen oqarpoq.
INI, kommune politiillu akunnerminni attaveqatigiikkaangamik nalinginnaasumik qangatut allakkatigut attaveqatigiittarput. Periuserli taanna arriingaarami anisitsiffissaq nallerpat anisitsinerit pinngisaannarlutik.
Kinguartoortoqannginniassammat Maniitsumi INI, politiit, kommunelu emailikkut oqarasuaatikkullu attaveqartarput, taamaasillutillu anisitsiffissaq nallerpat akiitsulinnik anisitsiartorsinnaasuaannarlutik.
Maniitsumi isumaginnitseqarfiup aamma ilaqutariit meerallit immikkut ikiorsernissaat eqqumaffigisaqai, qulakkerniarneqartarporlu akiitsut amerlassusaasa 10.000 kronet qaangissanngikkaat.
Maniitsumi kommunemiit aamma ilaqutariit akiitsullit aningaaserivimmi budgetkontoliornissaat sulissutigisarpaat, ilaqutariinnilu atornerluisoqartillugu atornerluisunut katsorsaasoq atorluarneqartarluni.
Maniitsumi massakkut attartortut 571.000 koruuninik akiitsoqarput, taakkulu illoqarfinnut allanut naleqqiullugit ikinneroqaat.
