Maniitsoq Sisimiullu kattunnissamut piareerput
Maniitsup Sisimiullu kommunii maajip ulluisa aallaqqaataanni 2009-mi kattunnissaminnut piareerput. Kommunit taakku marluk kommunalbestyrelsii ataatsimeeqatigeerlutik tamanna isumaqatigiissutigaat.
Kommunerujussuup pilersussap taassuma ikinnerpaamik 8.000-nik innuttaqarnissaanik, pisortallu suliassaataasa pitsaasumik isumagineqarnissaannik, aningaasatigullu atasinnaassutsimik piumasarisai aaqqissuussaanermut isumalioqatigiissitap taama aalajangernikkut naammassissavai.
Maniitsup Sisimiullu kommunalbestyrelsii kommunit taakku marluk kisimiillutik kattunniarlutik aalajangerput. Kangaatsiap Kommunea avannaani kommuninik kattusseqateqassaguni pitsaanerpaassasoq isumaqarput, tassa Kangaatsiaq allatigut avannaaniit ullumikkut kiffartuunneqareermat, taamatullu ingerlaavartumik suleqateqareerluni.
Kommunit taakku marluusut akissarsialeriffiisa kattunnissaat Maniitsup Sisimiullu kommunalbestyrelsiisa peqatigitillugu aalajangerpaat, tamatumanilu 2007-ip ingerlanerani isumaqatigiissusiornissartik aalajangiuppaat, kommunit taakku marluusut inuussutissarsiutitigut ineriartortitsinissaasa ataqatigiissaarnissaat tamatumani siunertaralugu.
