Pensionit ukiuni 38-ni akisussaaffigineqarsimanerat Naleqqap arajutsigaa
Partii Naleqqami politikerip apeqqummini erseqissarpaa Kalaallit Nunaanni, Savalimmiuni Danmarkimilu pensionisiat assigiinnginnerat inuit pisinnaatitaaffiinik unioqqutitsinerusoq.
Nassuiaatissarli aana: Tassa Kalaallit Nunaata Namminersorluni Oqartussaanerup eqqunneqarnerani 1979-imi isumaginninnermut tunngasut tigugamigit aamma inatsisit pensionisianut tunngasut tigusimagai, isumaginninnermut naalakkersuisoq Sara Olsvig nassuiaavoq.
AAMMA ATUARUK Inatsisartut Naalakkersuisunut apeqqarissaarput
Taamaattumik ingasattumik imminut pingaartinnerunanilu inuit pisinnaatitaaffiinik unioqqutitsinerunngilaq, ukiulli 38-t ingerlanerini assigiinngitsunik pingaarnersiusoqartarsimanera peqqutaalluni.
Akissummi aamma erserpoq, soraarnerussutisiallit tigusartagaasa annertussusaat tassaasut nunap najukkap annertussusiligaa, taamaattumillu aappariit Danmarkimi soraarnerussutisiallit, aappariinnut maani najugalinnut naleqqiullutik, ukiumut 9.000 koruunit missaannik amerlanerusunik pissarsisartut.
