Unnerluussaasorpassuit eqqartusivilianngitsoortarput
Suleqatigiissitaliat Danmarkimi eqqartuussiveqarnermi aqutsisoqarfimmeersut nalunaarusiaanni tamanna atuarneqarsinnaavoq. Septembarimi oktobarimilu sapaatip-akunnerini tallimani takuneqarsinnaavoq eqqartuussinissat katillugit 178-it kinguartinneqartariaqarsimasut, unnerluutigineqartup eqqartuussinermi najuutinnginnera matumani pissutaalluni. Danmarkimi aviisit ilaat Metroxpress taama allaaserisaqarpoq.
29-nik ukiulik Najaaraq Petersen, maanna Aalborgimi najugalik tassannga misigisaqarnikuuvoq, tassami pinngitsaaliilluni arneriffigineqarnikuunini taassuma siorna nalunaarutiginikuuaa, eqqartuussinissalli marluk kinguartiinnarneqartariaqarsimapput, unnerluutigineqartoq eqqartuussinermi najuussimanngimmat. Suliaq aviisimit allaaserineqareermat aatsaat angut tigusarineqarpoq, qaammatillu massuma ingerlanerani eqqartuunneqartussanngorluni.
- Maanna taava Kalaallit Nunaannukassaanga, angut taava pineqaatissinneqarsinnaassaaq, uangalu ingerlariaqqissinnaanngussallunga, Najaaraq Petersen Metroxpressimut oqarpoq.
Suliamut atatillugu ilisimannittunik 39-riarluni sassartitsisoqarsinnaasimanngitsoq, Danmarkimi eqqartuussiveqarnermi aqutsisoqarfiup nalunaarusiaani aamma takuneqarsinnaavoq.
Suliap unnerluutigineqartumut ilisimannittumulluunniit nalunaarutigineqarsimannginnera aamma pissutaalluni, suliaq kinguartinneqartariaqarsimasoq aamma allaaserineqarpoq, tassami assersuutigalugu emailikkoorlugu tamanna ajornarami, pineqartumummi ornigulluni tamanna pisartussaammat.
