KISITSISIT NUTAAT Kisermaatut inuusut amerlanerusut
Kalaallit Nunaannimi ilaqutariit nalunaarsorneqarnerannut kisitsisit qimerlualaaraanni ilaqutariit amerlanerujartuinnartut inersimasut kisimiittut meeraqanngitsullu amerlanerujartuinnartut takuneqarsinnaavoq.
Kalaallit Nunaanni Naatsorsueqqissaartarfiup kisitsisaataanni tamanna atuarneqarsinnaavoq.
Ilaqutariit 30.000-ngajaat akornanni 17.500-nit amerlanerusut kisimiittuupput meeraqanngitsut, procentinngorlugit ilaqutariit 60 procentiisa missaat tassaapput inersimasut kisimiittut meeraqanngitsullu.
Kisimiittut taamaasillutik ukiut qulit kingulliit ingerlaneranni 1700-t sinnerlugit amerlisimapput.
Katittut aamma ikiliartortut kisitsisit aamma takutippaat. Katissimasut 2007-imi 6917-iupput, ukioq manna 6575-iullutik.
Nunatsinni ilaqutariit 30.000-ngajaat akornanni 8555-it meerartaqarput imaluunniit inuusuttut angajoqqaaminni najugaqartut, inersimasullu kisimiittut akornanni 16 procentii meerartaqartut Naatsorsueqqissaartarfiup kisitsisaataasa takutippaat.