Mandelap inuunera allangortippaa
Nelson Mandelap naapinneratigut Lars-Emil Johansenip inuuneranut sakkortuumik sunniuteqarpoq.
Ukioq 1995 taamanikkut Naalakkersuisut siulittaasuat ateqarpoq Lars-Emil Johansen.
Nunatsinni inuussutissarsiutinik ingerlataqartut arlaqartut angalaqatigalugit Sydafrikamiipput, aningaasat 700.000 kr-nit Nelson Mandela-mut tunnikkiartorlugit.
Aningaasat taakkua nunatsinni katersorneqarput taakkua Sydafrikami meeqqat aningaasaateqarfissaannut tunniunneqarput aningaasaateqarfik taanna Nelson Mandelap atianik taaguuteqartinneqarpoq.
Lars-Emil Johansen Nelson Mandelalu nalunaaquttap akunnerata affaa oqaloqatigiipput.
Tamannalu Lars-Emilip inuuneranut sakkortuumik sunniuteqarpoq
- Nelson Mandelap naapinnera sioqqullugu aamma kingorna inuunera allanngorluinnarpoq, Lars-Emil Johansen oqarpoq, - Nelson Mandela akiniaarusussuseqanngitsuuvoq kamaassaqanngitsoq, sakkortuuliornermik pissuseqanngitsoq kisiannili saammaassisoq isumakkeerfiginnittorlu aammalu eqqisseqatigiinnikkumasoq, Lars-Emil Johansen oqarpoq.
Aningaasat katersorneqartut Lars-Emil Johansenip angalaqataasalu Nelson Mandelamut tunniuppaat , tassunga ilanngullugu inuusaliaq Nelson Mandelap angeqqatigisaa juullip inuatut atisalersorneqarsimasoq nassarneqarpq taamatullu qilaat aammma tunniunneqarpoq.
Nelson Mandelap oqaloqatigineratigut malunnarpoq Kalaallit Nunaat Nelson Mandelamut takornartaanngitsoq, Kalaallit Nunaat sumiittoq aamma inui nalunngilai kiisalu naggueqatigiit Inuit ilisimasaqarfigai, tassami Igloolikmut timmisartumik aqqusaarnermini naggueqatigut oqaloqatigisimavai. Lars-Emil Johansen Sydafrikamut tikeraarnermi qilaammik nassarpoq Nelson Mandelamut tunniunneqartussaq. Qilaat pillugu Nelson Mandela paasissaqarusuppoq apersuillunilu sumut taanna atorneqartarnersoq paasiniarlugu. Qilaat siulitta Inuit naapertuilluarnerup nassaariniarneqanerani atortaraat Mandela nassuiaaneqarami nuannaarpoq, Lars-Emil Johansen oqarpoq.
Lars Emil Johansen Nelson Mandelalu oqaloqatigiinneranni nunatsinni aningaaat katersorneqartut tunniunneqarnerat pingaarnerpaatut oqaluuserineqanngillat.
Aningaasat katersorneqartut oqaloqatigiinnermi annitsuinnarmik eqqartorneqarput.
- Oqaloqatigiinnermi Nelson Mandelap oqariartuutaa pingaarneq tassaavoq, saammassinermik isumakkeerfiginninnermillu oqariartuutaa.
Nelson Mandela 1962-mit 1990 tungaanut parnaarussaaqavoq. - ukiut 28ngajaat parnaarussaasimanera annerusumik sunniuteqarsimanngitsoq Lars-Emil Johansen Nelson Mandelamik naapitsinerani 1995mi pisumi maluginiarpaa.
Nelson Mandelap præsidentinngornerata kingorna peqqussuteqarpoq qaqortumik amillit qernertumillu amillit immikkoortinneqassanngitsut tamannalu Lars Emil Johansen 1995imi Johannesburg-imi tikeraarnerani uppernarsineqarpoq, illoqarfimmi aqutsisut ataatsimiinnerani qaqortumik amillit qernertumillu amillit sanileriillutik ataatsimiittut alakkarneqarput.
