Demokraatit pineqaatissinneqarsimasunut inissiisarfinnik amerlanerusunik pilersitserusupput
Pineqaatissineqarsimasunut inissiisarfinni utaqqisut ikilisinniarlugit utaqqiisaasumik inissiisarfiliornissamik aaqqiinnissat Demokraatinit naammagineqanngillat.
Malene Vahl Rasmussen inatsisartuni Inatsisartuni Ilaqutariinnemrut Peqqissutsimullu Ataatsimiititaliami siulittaasoq taama oqarpoq.
Pineqaatissinneqarsimasunut inissiisarfinnut utaqqisuniittut
Nunatsinni pineqaatissinneqarsimasut illoqarfinni qulingiluani nunaqarfinnilu sisamani pineqaatissinneqarsimasut inissiisarfimmiilernissaminnut utaqqisoqarpoq.
Taakkunannga:
- 25-t kinguaassiutitigut pinerluuteqarsimapput (taakkunannga 15-it meeqqanut 15-it inorlugit ukiulinnut pinerluuteqartuullutik)
- 21-t nakuusernermut atatillugu eqqartuussaasimapput
- 13-it aanngajjarniutinut inatsisit pillugit eqqartuussaasimapput
- Tallimat tillinnermut, pisuttorniarluni pinerluuteqarnermut assingusumullu atatillugu eqqartuussaasimapput.
Tusarfik: Nunatsinni Pinerluttunik Isumaginnittoqarfik
- Ukiorpassuarni takunikuuarput pineqaatissineqarsimasunut inissiisarfinni inissaaleqineq ajornartorsiutaasartoq, taamaattumik demokraatinit isumaqarpugut piffissaq sivisunerusoq eqqarsaatigalugu aaqqiisoqartariqartoq, utaqqiisaasumillu aaqqiinerit naammaginngilagut, Malene Vahl Rasmussen oqarpoq.
Nuna tamakkerlugu pineqaatissinneqarsimasunut inissiisarfinni 154-ni inissaqartumi inuit 65-it inissinneqarnissaminnut utaqqipput.
Tamanna pillugu IA sinnerlugu Folketingemi ilaasortaq, Aaja Chemnitz Larsen siunnersuuteqarpoq, utaqqiisaasumik pineqaatissinneqartut inissinneqarfissaannik - assersuutigalugu Kangerlussuarmi pilersitsisoqartariaqartoq.
Utaqqisuniittoqarnera ilisimaneqarluarpoq
Pineqaatissinneqarsimasunut inissiisarfinni utaqqisisoqartarnera nutaajunngilaq.
Ukiut kingullit qulit 15-illu utaqqisut amerlisarput ikilisarlutillu. Inuit 354-it ukioq 2013-mi pineqaatissinneqarsimasunut inissiisarfinnut utaqqipput.
Tamanna pillugu Pinerluttunik isumaginnittoqarfik Kangerlussuarmi pinerluuteqarsimasunut inissiisarfiugallartussanik pingasoriarluni pilersitsinikuuvoq.
AAMMA ATUARUK Ministeri utaqqisuniittut pillugit: Kinguaassiutitigut pinerluuteqarsimasut utaqqiinnartarnerat ajornartorsiutaavoq
Pinerluuteqarsimasunut inissiisarfinni parnaarussivinnilu sulisussanik ilinniarsimasunik Kalaallit Nunaanni Danmarkimilu amigaatineqartorujussuupput.
Tamanna pillugu Malene Vahl Rasmussen ima oqarpoq:
- Qallunaat naalagaaffiata akisussaaffigivaa naammattunik sulisunik ilinniartitsinissaq,neriuppugullu tamanna naammattumik suliarineqarumaartoq, suleqataanissatsinnullu ammavugut
Malene Vahl Rasmussenip ilanngullugu oqaatigaa, pineqaatissineqarsimasunut inissiisarfinni sulilernissamut soqutigineqalernissaanut atuarfinni ilinniarfinnilu paasisitsiniaasoqartariaqartoq.
Danskit Inatsiseqarnermut ministerip, Nick Hækkerupip, pineqaatissinneqarsimasunut inissiisarfinnik amerlanerusunik pilersitsisoqarnissaanut Naalakkersuisut oqaloqatigigaa, Inatsiseqarnermut ministereqarfik KNR-imut oqarpoq.
