Spaniami coronamik toqquteqartut amerlanerungaatsiarsinnaapput
Spaniap nunami coronavirusimik tunillatsissimallutik toqusutut nalunaarsorsimasai ikippallaarsinnaapput.
Spaniami aviisit annersaat El Pais naapertorlugu, inuit 45.000-ingajaat toqusimapput.
Taakku Spaniami peqqissutsimut oqartussanit nalunaarsorneqarsimasunit 28.000-it missaanniittunit amerlanerupput.
Inuit 28.432-it toqusimasut pisortatigoortumik sapaatiummat nalunaarsorneqarsut, coronavirusimit napparsimanersut toqunnginneranni misissuiffigitissimapput.
AAMMA ATUARUK Tuluit Spaniami takornariarsimasut angerlarsimaannarallartarnissaannik maleruagassiortut
Toqusulli pisortatigoortumik nalunaarsorneqarsimasunit amerlanerujussuusinnaasut El Paisip Spaniami nunap ilai 17-it attaveqarfigigamigit kisitsisit amerlanerorataannaasut paasivaa.
Inuit 16.436-it kisitsisit atorlugit nassuiaasiornermi allaqqanngitsut coronavirusimik toqquteqarsimasut aviisip paasivaa.
Taakkunannga 2.000-it coronavirusimik tunillatsissimasutut misissuisarfimmit uppernarsarneqarput, Spaniamili peqqissutsimut oqartussaannit nalunaarsorneqarsimarpasinnatik.
Taakkunani 14.000-it coronavirusimik tunillatsissimallutik toqusimanissaannik uppernarsarneqarsimanngitsut coronavirusimik nakorsanit toqquteqarsimasorineqarput.
Taamaammat inuit coronavirsumik toqquteqarsimasut pisortatigoortumik nalunaarsorneqarsimasunit 28.000-init amerlanerusunit amerlanerussasut, kisitsisillu eqqortut 45.000-inut qaninnerussasut, El Paisip naatsorsuutigaa.
Tuniluunneq sioqqullugu utoqqaat illuanni toqorartut coronamik toqquteqarsimasinnaasutut naatsorsuutigineqartut nalunaarsorneqartunut ilaanngillat.
Utoqqaat illuanni toqusut amerlasut
Coronap tuniluutilinnginnernani utoqqaat illuanni toqorartut amerlapput, taakkulu coronamik toqquteqarsimasinnaasutut nalunaarsorneqarsimasunut ilaanngillat. Coronamilli toqquteqarsimanissaat ilimagineqarpoq.
Tuluit nunaanni Frankrigimilu utoqqaat illuanni coronavirusimik toqquteqarsimasut statistikkimi saqqummiunneqartalissasut apriilimi aalajangerput. Spaniamili suli taamaaliortoqanngilaq.
